کیا انگین آلتان پاکستان آنے والے ہیں؟

شہرہ آفاق تُرک سیریز ’ارطغرل غازی‘ میں ’ارطغرل‘ کا مرکزی کردار ادا کرنے والے انگین آلتان کے بارے میں یہ خبر زیر گردش ہے کہ وہ 18 اگست کو پاکستان کا دورہ کریں گے۔

سوشل میڈیا پر تیزی سے مقبول ہوتی ویڈیو میں انگین آلتان کو یہ کہتے سُنا جاسکتا ہے کہ وہ 18 اگست کو تین شدید بیمار پاکستانی مریضوں سے ملاقات کریں گے۔

انہوں نے اپنے ویڈیو پیغام میں کہا کہ ’ہیلو پاکستان، میں میک اے وِش چلڈرن سے 18 اگست کو ملاقات کروں گا، آپ سب سے جلد ملاقات ہوگی۔‘

خیال رہے کہ پاکستان میں وزیر اعظم کی ہدایت پر اردو میں ڈب کر کے سرکاری ٹی وی چینل پر نشر کی جانے والی تُرک سیریز ’ارطغرل غازی‘ کے مرکزی کرداروں کو خوب پسند کیا جارہا ہے۔

انگین آلتان کی پاکستانیوں کو اردو میں جشن آزادی کی مبارکباد

شہرہ آفاق تُرک سیریز ارطغرل غازی میں مرکزی کردار ادا کرنے والے تُرک اداکار انگین آلتان نے پاکستان کے 73 ویں جشنِ آزادی کے موقع پر پاکستان میں موجود تمام مداحوں کو جشنِ آزادی کی مبارکباد دی ہے۔

حال ہی میں پاکستان کے یومِ آزادی کے موقع پر انگین آلتان نے اردو میں پاکستانیوں کو جشنِ آزادی کی مبارکباد دی تھی۔

سماجی رابطے کی ویب سائٹ ٹوئٹر پر استنبول میں پاکستان کے قونصل جنرل بلال خان پاشا نے بتایا کہ یومِ آزادی پاکستان کے موقع پر انگین آلتان کو استنبول میں موجود پاکستانی قونصلیٹ میں مدعو کیا گیا۔

انگین نے اپنے ویڈیو پیغام میں پاکستان کی قومی زبان اردو میں جشن آزادی کی مبارکباد دیتے ہوئے کہا کہ ’تمام اہلِ پاکستان کو جشن آزادی مبارک۔‘