کراچی (اسٹاف رپورٹر)چیئرمین پاک سر زمین پارٹی سید مصطفیٰ کمال نے کہا ہے کہ مہاجروں کے نام نہاد لیڈروں میڈیا کے سامنے مہاجر جرگہ بلاؤ، مہاجروں کے تمام بزرگ اور نام نہاد لیڈر ایک ساتھ اپنی مرضی کی جگہ اور وقت پر آجائیں، میں اکیلا آؤنگا، نیوٹرل امپائرز کے سامنے اور دلیل کی بنیاد پر فیصلہ کرتے ہیں کہ مہاجروں کے لیے میرا راستہ درست ہے یا مہاجروں کے نام نہاد لیڈران کا راستہ ٹھیک ہے۔ اگر میرا راستہ دلائل کی بنیاد پر غلط ثابت ہوتا ہے تو میں سیاست چھوڑ دوں گا لیکن اگر مہاجروں کے نام نہاد لیڈران کا راستہ مہاجر دشمنی ثابت ہوتا ہے تو یہ مہاجروں کو دوسری قومیتوں سے لڑوانا بند کرکے سیاست چھوڑ دیں۔ان خیالات کا اظہار انہوں نے اہلیانِ گودھرا کالونی سے خطاب کرتے ہوئے کیا۔انہوں نے کہا کہ ایم کیو ایم مہاجروں کی سب سے بڑی دشمن جبکہ پیپلز پارٹی سندھیوں کی سب سے بڑی دشمن ہے۔ نئے صوبے کو بنیاد بنا کر فساد پھیلانے والے بدکردار، کرپٹ اور ناعاقبت اندیش افراد ناصرف لیاقت آباد کی ایک گلی بھی الگ نہیں کرسکتے بلکہ اپنی گندی سیاست کو چمکانے کے لیے کراچی میں آباد لاکھوں سندھی بھائیوں اور اندرون سندھ مقیم لاکھوں مہاجروں کی جان و مال کو خطرے میں ڈال رہے ہیں۔ انہوں نے کہا کہ وسائل اور اختیارات نچلی ترین سطح پر منتقل ہوجائیں اور عوام کے مسائل انکی دہلیز پر حل ہوں تو بھائی کو بھائی سے لڑانے والوں کی سیاست ناصرف ہمیشہ کیلئے دفن ہوجائے گی بلکہ پاکستان کی ترقی کے نئے دور کا آغاز ہوگا۔
فرمان الہی
نماز کے اوقات
