کراچی میں ہیٹ ویو 18 اکتوبر تک رہے گی

پچھلے کچھ دنوں سے کراچی ہیٹ ویو کی لپیٹ میں ہے، وسطی ایشاء میں موجود ہوا کا زائد دباؤ اس ہیٹ ویو کی وجہ ہے جس کے باعث کراچی میں ہواؤں کا رخ تبدیل ہوا ہے، محکمہ موسمیات نے 18 اکتوبر تک کراچی میں ہیٹ ویو برقرار رہنے کا امکان بھی ظاہر کیا ہے۔

کراچی میں ان دنوں گرمی اور خنکی کا امتزاج لیے موسم اپنا رنگ دکھا رہا ہے، دن میں شہر ہیٹ ویو کی لپیٹ میں ہے اور رات میں خنک ہوائیں موسم سرما کی راتیں یاد دلا دیتی ہیں۔

کراچی ہیٹ ویو کی لپیٹ میں

کراچی ہیٹ ویو کی لپیٹ میں آگیا ہے، محکمۂ موسمیات کی پیش گوئی کے مطابق شہر میں 24 گھنٹوں کے دوران موسم گرم، کبھی شدید گرم اور خشک رہنے کا امکان ہے۔

اکتوبر کا مہینہ کراچی کے گرم مہینوں میں شمار کیا جاتا ہے لیکن ان دنوں موسم کا ایک الگ ہی رنگ کراچی والے دیکھ رہے ہیں۔ محکمہ موسمیات کے30 سالہ ریکارڈ میں اکتوبر کا معمول کا اوسط کم سے کم درجہ حرارت 21.9 ڈگری سینٹی گریڈ ہے۔

آج کم سے کم درجہ حرارت 20 ڈگری سینٹی گریڈ ریکارڈ کیا گیا جو اکتوبر کے معمول کے درجہ حرارت سے کم رہا۔ اب تک کے ریکارڈ کے مطابق 30 اکتوبر 1984 میں 11.7 ڈگری سینٹی گریڈ کم ترین درجہ حرارت ریکارڈ کیا جاچکا ہے۔

محکمہ موسمیات کے مطابق کراچی میں کم سےکم درجہ حرارت 20ڈگری سینٹی گریڈریکارڈ کیا گیا ہے جبکہ زیادہ سے زیادہ درجہ حرارت 39سے41 ڈگری سینٹی گریڈ رہنے کا امکان ہے۔

کراچی: پورا ہفتہ ہیٹ ویو کا امکان

محکمۂ موسمیات نے کراچی میں پورا ہفتہ گرمی کی شدت برقرار رہنے کی پیش گوئی کرتے ہوئے شہرِ قائد سمیت سندھ بھر کے لیے ہیٹ ویو کا الرٹ جاری کر دیا ہے۔

کراچی میں ہوا میں نمی کا تناسب15فیصد ہے، شمال سے ہوائیں 18کلومیٹر فی گھنٹہ کی رفتار سے چل رہی ہیں۔

گرم موسم کا باعث بننے والی یہ بوچستان کی شمالی ہوائیں سورج ڈھلتے ہی خنک ہوجاتی ہیں، شمالی سمت سے چلنے والی یہ ہوائیں کراچی کا موسم گرد آلود بھی کررہی ہیں۔یہی وجہ ہے کہ کراچی کی فضا میں آلودہ زرات کی مقدار مقررہ معیار سے زائدہے جو حساس لوگوں کے لیے سازگار نہیں ہے ۔