نیشنل ٹی20: کھلاڑیوں سے رابطہ کرنے والا بکی گرفتار

راولپنڈی میں جاری نیشنل ٹی ٹوئنٹی کپ کے دوران کھلاڑیوں سے رابطہ کرنے والے بکی کو گرفتار کرلیا گیا۔

پاکستان کرکٹ بورڈ (پی سی بی) نے تصدیق کی ہے کہ نیشنل ٹی ٹوئنٹی کپ کے دوران ایک مبینہ بکی نے ایک کھلاڑی سے رابطہ کیا۔

کھلاڑی نے پی سی بی اینٹی کرپشن یونٹ کو آگاہ کیا جس کے بعد ابتدائی تحقیقات مکمل کرکے معاملہ وفاقی تحقیقاتی ادارے (ایف آئی اے) کے حوالے کر دیا گیا ہے۔

ذرائع کا کہنا ہے کہ ایف آئی اے نے ایک مبینہ بکی کو حراست میں لے لیا، اس کے فون کا فارنزک ہوگا۔

نیشنل T20 کپ: بکی کا کھلاڑی سے رابطہ رپورٹ

پاکستان کرکٹ بورڈ (پی سی بی) نے نیشنل ٹی ٹوئنٹی کپ کے دوران ایک کھلاڑی سے مبینہ بکی کے رابطے کی تصدیق کردی، ڈائریکٹر پی سی بی اینٹی کرپشن اور سیکیورٹی لیفٹیننٹ کرنل (ر) آصف محمود نے کوڈ کی پاسداری کرنے پر کھلاڑی کی تعریف کی۔

مبینہ بکی کا کہنا ہے کہ کرکٹر اس کا دوست ہے اس نے مذاق میں ایسی بات کہی تھی۔

دوسری جانب پی سی بی اینٹی کرپشن یونٹ کی جانب سے کرکٹر کے اطلاع دینے کو قابلِ ستائش قرار دیا گیا ہے۔

ڈائریکٹر پی سی بی اینٹی کرپشن اینڈ سیکورٹی آصف محمود کا کہنا ہے کہ اس اطلاع کے بعد پی سی بی کے اینٹی کرپشن یونٹ نے اپنی تحقیقات کے دوران کچھ حساس معلومات حاصل کی ہیں، جنہیں مزید چھان بین کی غرض سے ایف آئی اے کے حوالے کردیا۔

انھوں نے یہ بھی کہا کہ پی سی بی تحقیقات میں ہونے والی پیشرفت کے حوالے سے آئی سی سی کو آگاہ کرتا رہے گا۔