آپ آف لائن ہیں
منگل8ربیع الثانی 1442ھ 24؍نومبر 2020ء
  • بانی: میرخلیل الرحمٰن
  • گروپ چیئرمین و ایگزیکٹوایڈیٹر: میر جاوید رحمٰن
  • گروپ چیف ایگزیکٹووایڈیٹرانچیف: میر شکیل الرحمٰن
Jang Group

صحافی علی عمران کے اغواء کا مقدمہ درج


کراچی پولیس کا کہنا ہے کہ جیو نیوز کے رپورٹر علی عمران سید کی گمشدگی سے متعلق تحقیقات کا آغاز کر دیا ہے اور صحافی کے اغواء کا مقدمہ درج کر لیا گیا ہے۔

پولیس نے کہا ہے کہ ایس ایچ او تھانہ سچل نے رپورٹر علی عمران سید کے گھر جاکر ان کے بھائی اور دیگر عزیز و اقارب سے واقعہ کی تفصیلات حاصل کی ہیں اور مقدمے کے اندراج کی کارروائی کا آغاز کیا۔

پولیس کی جانب سے مقدمہ نمبر 1006 اغواء سمیت دیگر دفعات کے تحت علی عمران کے بھائی طالب رضوی کی مدعیت میں درج کیا گیا ہے جس میں نامعلوم افراد کو نامزد کیا گیا ہے۔

اس سے قبل کراچی پولیس چیف غلام نبی میمن کا کہنا تھا کہ ’جیو نیوز‘ کے رپورٹر علی عمران سید کے لاپتہ ہونے کا مقدمہ درج کرنے کیلئے تیار ہیں۔


پولیس چیف کا یہ بھی کہنا ہے کہ علی عمران سید کی بازیابی کے لیے ہر ممکن کوششیں کی جائیں گی۔

واضح رہے کہ کراچی میں جیو نیوز کے سینئر رپورٹر علی عمران سید کو15 گھنٹے گزر جانے کے باوجود تاحال تلاش نہیں کیا جاسکا ہے، اہلخانہ کاکہنا ہے کہ علی عمران جمعہ کی شام گھر سے قریبی بیکری تک گئے تھے مگر واپس نہیں آئے۔

مسز علی عمران سید کا کہنا تھا کہ ان کے شوہر یہ کہہ کر باہر نکلے تھے کہ وہ آدھے گھنٹے میں لوٹ آئیں گے، موبائل فون گھر میں اور گاڑی گھر کے باہر کھڑی ہے۔

پولیس کا کہنا تھا کہ اس علاقے میں اس طرح کا واقعہ اس سے قبل نہیں ہوا، شواہد اکٹھے کرکے کیس کو حل کرنے کی کوشش کی جائیگی۔

قومی خبریں سے مزید