آپ آف لائن ہیں
بدھ9؍ربیع الثانی 1442ھ25؍نومبر 2020ء
  • بانی: میرخلیل الرحمٰن
  • گروپ چیئرمین و ایگزیکٹوایڈیٹر: میر جاوید رحمٰن
  • گروپ چیف ایگزیکٹووایڈیٹرانچیف: میر شکیل الرحمٰن
Jang Group

چند ممالک کے غیر ذمے دار عناصر توہین آمیز حرکتیں کر رہے ہیں، پاکستان

پاکستان نے آزادی اظہار رائے کی آڑ میں منظم اسلامو فوبک مہم کی شدید مذمت کی ہے اور اس جیسے اقدام کو نیوزی لینڈ مساجد حملے جیسی دہشت گردی کی بنیاد قرار دیا ہے۔

ترجمان دفتر خارجہ نے اس حوالے سے جاری ایک بیان میں کہا کہ چند ممالک غیر ذمے دار عناصر کے ذریعے توہین آمیز حرکتیں کر رہے ہیں، جن کی پاکستان شدید مذمت کرتا ہے۔

ترجمان نے مزید کہا کہ اسلام کو دہشت گردی سے مساوی کرنے اور سیاسی فوائد کے لیے پریشان کن بیانات دینے پر پاکستان کو تشویش ہے۔


انہوں نے کہا کہ نفرت انگیز بیانات، اسلاموفوبک کارروائیاں کرائسٹ چرچ جیسی دہشت گردی کی اصل بنیاد ہیں۔

ترجمان دفتر خارجہ نے یہ بھی کہا کہ ایسے عمل تہذیبوں میں امن اور ہم آہنگی کے مستقبل کے امکانات متاثر کرتے ہیں۔

ان کا کہنا تھا کہ پاکستان نے او آئی سی میں تمام مذاہب، عقائد کے لیے باہمی افہام و تفہیم اور احترام کے لیے وکالت کی، ہم مذہب یا عقیدے کی بنیاد پر ہر طرح کے تشدد کی مذمت کرتے ہیں۔

ترجمان دفتر خارجہ نے کہا کہ وزیراعظم عمران خان نے اقوامِ متحدہ کے 75ویں جنرل اسمبلی اجلاس سے خطاب میں اسلاموفوبیا کے حالیہ واقعات پر روشنی ڈالی۔

انہوں نے کہا کہ وزیراعظم نے اسلاموفوبیا کے خلاف عالمی دن منانے کی بھی تجویز پیش کی تھی۔

قومی خبریں سے مزید