کراچی میں مزید 3 ڈاکٹرز کورونا وائرس سے انتقال کرگئے

محکمہ صحت حکام کے مطابق کورونا وائرس سے جناح اسپتال سے ریٹائرڈ ڈاکٹر طاہر امین چوہدری انتقال کرگئے،نجی کلینک کے ڈاکٹر وسیم الدین بھی کورونا وائرس سے چل بسے، جبکہ سابق ڈی جی ہیلتھ اور ای این ٹی اسپیشلیسٹ ڈاکٹر عبدالستار کوروائی بھی کورونا وائرس سے انتقال کر گئے۔

ذرائع کے مطابق ڈاکٹر عبدالستار کوروائی چند روز سے نجی اسپتال میں وینٹیلیٹر پر تھے۔

پاکستان میڈیکل ایسوسی ایشن کے مطابق ملک بھر میں ابتک کورونا وائرس سے 138 ڈاکٹرز جاں بحق ہوچکے ہیں۔

ملک بھر میں کورونا وائرس کے مریضوں کی تعداد میں تیزی سے اضافہ

ملک بھر میں عالمی وبا کورونا وائرس کی دوسری لہر نے شدت اختیار کر لی ہے، پاکستان میں کورونا وائرس کے مریضوں کی تعداد میں تیزی سے اضافہ ہورہا ہے۔

واضح رہے کہ نیشنل کمانڈ اینڈ آپریشن سینٹر (این سی او سی) کا کہنا ہے کہ گزشتہ روز ملک بھر میں کورونا وائرس سے مزید 50 افراد انتقال کر گئے ہیں، ان میں سے 94 فیصد اسپتالوں میں تھے۔

اس کے علاوہ ملک بھر میں سب سے زیادہ کورونا وائرس مثبت آنے کی شرح کراچی میں 18.43 ریکارڈ کی گئی ہے۔