چین کا امریکا سمیت دیگر ممالک پر غلط اقدامات فوری روکنے پر زور

چین نے سنکیانگ ریجن کی کپاس اور ٹماٹر سے بننے والی تمام مصنوعات پر پابندی کے معاملے پر امریکا سمیت دیگر ممالک سے غلط اقدامات فوری روکنے پر زور دیا ہے۔

چینی وزارت تجارت کے ترجمان نے ایک بیان میں کہا ہے کہ چین، چینی کمپنیوں کے مفاد کے تحفظ کے لیے ہر ضروری اقدامات کرے گا۔

امریکا نے چین کے سنکیانگ ریجن کی کپاس اور ٹماٹر سے بننے والی تمام مصنوعات پر پابندی لگائی ہے۔

امریکی حکام کے مطابق سنکیانگ مصنوعات پر پابندی جبری مزدوری کے خدشات پر لگائی گئی ہے۔

امریکی محکمہ داخلہ سیکیورٹی کے قائم مقام سربراہ کے مطابق اس پابندی سے امپورٹرز کو یہ پیغام بھیجا گیا ہے کہ کسی بھی طرح کی جبری مشقت برداشت نہیں کی جائے گی۔

واضح رہے کہ گزشتہ سال امریکا نے چین سے 9 ارب ڈالر کی کپاس اور 10 ملین ڈالر کی ٹماٹر سے بنی مصنوعات درآمد کی تھیں۔