پاکستان کرکٹ ٹیم نے دوسرے دن بھی بھرپور ٹریننگ کی

جنوبی افریقا سے ٹیسٹ سیریز میں مقابلے کے لیے پاکستان کرکٹ ٹیم نے دوسرے دن بھی بھرپور ٹریننگ کی۔ ساڑے چار گھنٹے پر مشتمل سیشن میں کھلاڑیون نے فیلڈنگ، بولنگ اور بیٹنگ کی خوب پریکٹس کی۔

نیشنل اسٹیڈیم کراچی میں پاکستان ٹیم کا دوسرا ٹریننگ سیشن ساڑھے چار گھنٹے جاری رہا، جس میں کھلاڑیوں نے پہلے فزیکل ٹریننگ کی، پھر فیلڈنگ اور کیچنگ پریکٹس کا سیشن ہوا، سلپ میں تیز کیچز اور باؤنڈری پر اونچے کیچز لینے کی بھی خوب مشق کی گئی۔

ایک گھنٹے بعد بیٹنگ اور بولنگ کی پریکٹس کی گئی، جس میں بیٹسمینوں کو مختلف اہداف دیئے گئے۔

قومی ٹیم کی شرٹ پہن کر ٹریننگ کے جذبات ناقابل بیان ہیں، تابش خان

پاکستان کرکٹ اسکواڈ کا حصہ بننے والے فاسٹ بولر تابش خان کا کہنا ہے کہ نیشنل اسٹیڈیم میں بہت کرکٹ کھیلی، لیکن قومی ٹیم کی شرٹ پہن کر ٹریننگ کرتے وقت جو ان کے جذبات تھے انہیں بیان نہیں کر سکتے۔

اس موقع پر مصباح الحق، یونس خان اور محمد یوسف نے کھلاڑیوں کی کارکردگی کا جائزہ لیا، بولرز کو ثقلین مشتاق اور وقار یونس نے ٹپس دیئے۔

پریکٹس کے بعد امپائر علیم ڈرا کی امامت میں ٹیم نے گراؤنڈ میں ہی نماز جمعہ ادا کیا۔

دوسری جانب جنوبی افریقا ٹیم نے کراچی جیمخانہ میں انٹرا اسکواڈ میچ کھیلا۔

پاکستان اور جنوبی افریقا کی ٹیمیں کل ایک وقت میں نیشنل اسٹیڈیم میں پریکٹس کریں گی۔