ملالہ کی کابل اسکول حملے کی شدید الفاظ میں مذمت

دُنیا کی کم عمر ترین نوبیل انعام یافتہ پاکستانی ملالہ یوسف زئی نے افغانستان کے دارالحکومت کابل میں اسکول پر ہونے والے دہشتگرد حملے کی شدید مذمت کی ہے۔

سماجی رابطے کی ویب سائٹ ٹوئٹر پر جاری کیے گئے پیغام میں ملالہ یوسف زئی نے کہا کہ کابل میں دہشت گردوں نے اسکول کے بچوں پرہولناک حملہ کیا۔

ملالہ یوسف زئی نے کہا کہ اسکول بچوں میں زیادہ تر لڑکیاں تھیں۔

اُنہوں نے یہ بھی کہا کہ دہشت گردی میں اضافہ افغان امن اور جمہوریت کے لیے خطرناک ہے۔

ملالہ یوسف زئی کا مزید کہنا تھا کہ عالمی رہنماوں کو اسکول کے بچوں کی حفاظت کے لیے متحد ہونا چاہیے۔

کابل: بم حملے سے جاں بحق افراد کی تعداد 55 ہوگئی

افغان صدر نے سیدالشہدا اسکول پر حملے میں طالبان کو ملوث قرار دیدیا جبکہ طالبان کے ترجمان ذبیح ﷲ مجاہد کی جانب سے الزام کی سختی سے تردید اور حملے کی مذمت گئی ہے

واضح رہے کہ افغان دارالحکومت کابل میں طالبات کے اسکول کے نزدیک بم دھماکے میں 55 افراد جاں بحق ہوگئے جبکہ  متعدد افراد بھی زخمی ہوئے۔

افغان حکام کے مطابق دھماکا اس وقت ہوا، جب طالبات اسکول سے باہر نکل رہی تھیں۔

دھماکے کے بعد شہر بھر کے اسپتالوں میں ایمرجنسی نافذ کردی گئی۔