فرمان الہی
نماز کے اوقات
قومی احتساب بیورو (نیب) کراچی نے چیئرمین نیب اور ڈی جی نیب کراچی کے نام پر لوٹ مار کے معاملے کی تحقیقات میں 50 سے زائد سرکاری افسران اور تاجروں کو شاملِ تفتیش کر لیا۔
نیب حکام کے مطابق ڈی جی نیب کے نام پر جعل سازی میں خالد سولنگی سے متعلق تحقیقات جاری ہیں، خالد سولنگی کو رقم دینے والوں میں ایڈیشنل ہوم سیکریٹری عامر خورشید بھی شامل ہیں۔
نیب ذرائع نے بتایا کہ نیب کی طلبی پر عامر خورشید جواب دینے کے بجائے رخصت لے کر امریکا چلے گئے۔
نیب ذرائع کے مطابق خالد سولنگی اور ان کے بیٹے عامر حسین کو ڈسٹرکٹ فوڈ آفیسر بدین منور میرانی نے بھی رقم دی تھی۔
۔فوڈ آفیسر منور میرانی نے 50 لاکھ روپے ادا کیئے جبکہ مزید 30 لاکھ ادا کرنے تھے۔
نیب ذرائع نے بتایا کہ اسپیشل ہوم سیکریٹری نے مقدمات سے بچنے کے لیے 80 لاکھ روپے ادا کیئے۔
تاجر رفیق قریشی نے بھی جعل ساز گروہ کے سرغنہ خالد سولنگی کے گرفتار بیٹے عامر کو کروڑوں روپے کی ادائیگی کی۔
نیب حکام کے مطابق خالد سولنگی کو دبئی سے انٹر پول کے ذریعے گرفتار کرنے کے لیے وزارتِ داخلہ کو درخواست بھیج دی گئی ہے۔
جعل ساز خالد سولنگی کے بیٹے عامر کو گزشتہ ماہ لاہور سے گرفتار کیا گیا تھا۔
نیب حکام کا کہنا ہے کہ خالد سولنگی اور اس کا گروپ نیب افسران بن کر سرکاری افسران اور کاروباری افراد کو بلیک میل کر کے رقم لیتے تھے۔
خالد سولنگی اور اس کے بیٹے کے زیرِ استعمال 400 سے زائد موبائل سمیں بھی برآمد کر لی گئی ہیں۔
