نئی دلی کے لال قلعہ حملہ کیس میں ضمانت ملنے کے چند گھنٹے بعد ہی بھارتی اداکار دیپ سدھو کو دوبارہ گرفتار کرلیا گیا۔
بھارتی میڈیا رپورٹ کے مطابق اس مرتبہ دیپ سدھو کو بھارتی آثارِ قدیمہ سروے (اے ایس آئی) کی جانب سے لال قلعہ کی دیواروں کو نقصان پہنچانے کے الزام میں درج کروائی گئی ایف آئی آر کے تحت گرفتار کیا گیا۔
خیال رہے کہ بھارتی یومِ جمہوریہ کے موقع پر نئی دلی کے لال قلعہ میں بھارتی کسانوں کے ساتھ احتجاج میں شریک ہونے کے جرم میں دیپ سدھو کو 9 فروری کو گرفتار کیا گیا تھا۔
دیپ سدھو کی ہنگامہ آرائی سے متعلق عدالت میں سماعت جاری ہے، تاہم دلی ہائی کورٹ نے مذکورہ کیس میں انھیں ضمانت پر رہا کرنے کا حکم جاری کیا تھا۔
نئی دلی کی خصوصی جج نیلوفر عابدہ پروین نے ضمانت پر رہائی کا حکم دیتے ہوئے دیپ سدھو کو 30 ہزار روپے کے ضمانتی مچلکے بھی جمع کروانے کا حکم دیا تھا۔