حسن علی کا خفیہ ہتھیار کیا ہے؟

21 جنوری ، 2022

قومی کرکٹ ٹیم کے فاسٹ بولر حسن علی نے انکشاف کیا ہے کہ ان کا ’خفیہ ہتھیار‘ ان کا باؤنسر ہے جو مخالف ٹیم کے بلے بازوں کو ’ہلا‘ دیتا ہے۔

حسن علی نے حال ہی میں دیے گئے اپنے خصوصی انٹرویو میں کہا کہ ’میں اپنی اِن سوئنگ کے لیے جانا جاتا ہوں جبکہ باؤنسر میرا خفیہ ہتھیار ہے جو بلے بازوں کو ہلا دیتا ہے۔

میزبان نے قومی کرکٹر سے سوال کیا کہ کیا وہ پاکستان سُپر لیگ (پی ایس ایل) میں شرکت کے منتظر ہیں؟ جس پر کرکٹر نے کہا کہ ’یہ تمام کرکٹرز کے لیے پُرجوش لمحات ہیں، میں جب سے پی ایس ایل شروع ہوا ہے اس میں کھیل رہا ہوں اور یہ ایک زبردست احساس ہے کہ آپ کے ملک کی اپنا ایونٹ ہونے والا ہے۔‘

حسن علی نے کہا کہ ’میں پی ایس ایل 7 کے لیے بے تاب ہوں اور میں رواں سال اپنی بہترین کارکردگی پیش کرنے کی اُمید کر رہا ہوں۔‘

غیر ملکی ٹیموں کے ملک کے دوروں کے بارے میں حسن علی نے کہا کہ’ہمارے میدانوں میں غیر ملکی کھلاڑیوں کے کھیلنے سے ہماری کرکٹ بہت زیادہ اثر پڑتا ہے، ہمارے نوجوان کھلاڑی ان سے بہت کچھ سیکھتے ہیں۔‘

انہوں نے کہا کہ ’یہ الفاظ میں بیان کرنا ناممکن ہے کہ ہوم گراؤنڈ پر کھیلنا کیسا محسوس ہوتا ہے، خاص طور پر اُس وقت کہ جب ہمارے ملک میں 10 سے 12 سال بعد کرکٹ کی واپسی ہو۔‘

حسن علی نے ٹی ٹوئنٹی ورلڈ کپ کے سیمی فائنل میں کیچ ڈراپ ہونے پر سوشل میڈیا پر ملنے والی محبت کے بارے میں بات کرتے ہوئے کہا کہ ’میں اکثر سوشل میڈیا کا استعمال نہیں کرتا لیکن میں نے دیکھا کہ میری مشکل گھڑی میں کتنے لوگوں نے میرا ساتھ دیا اور میں ان سب کا شکریہ ادا کرنا چاہتا ہوں۔‘

قومی کرکٹر نے کہا کہ ’جن لوگوں نے مجھ پر تنقید کی ان سے زیادہ لوگوں نے میری حمایت کی، اس لیے مجھے یقین ہے کہ وہ جانتے ہیں کہ میں میدان میں اپنی بہترین کارکردگی کا مظاہرہ کرتا ہوں۔‘