گھروں میں اسمارٹ ٹیکنالوجی کا بڑھتا استعمال

کیا آپ جانتے ہیں کہ اسپین میں تیار کیے جانے والے مستقبل کے ایک گھر کے مکین ہلکے سے اشارے سے اپنے رہائشی کمرے کی دیواروں پر نظر آنے والے انٹرنیٹ صفحات کو بدل سکتے ہیں اور کمرے کا نظارہ کسی سمندری ساحل یا کسی مصروف بازار میں بدل سکتے ہیں۔ اسپین میں تیار کیے جانے والے جدید ٹیکنالوجی سے آراستہ اس گھر کے پروٹو ٹائپ کو ’اسمارٹ ہوم‘ کا نام دیا گیا ہے۔ اس پروٹو ٹائپ کے حوالے سے اہم بات یہ ہے کہ اس میں استعمال کی جانے والی تمام کی تمام ٹیکنالوجی وہ ہے، جو اس وقت موجود ہے اور ویڈیو گیمز میں استعمال کی جا رہی ہے۔

اس پروٹو ٹائپ کو تیار کرنے والے ماہرین کی ٹیم نے ’انٹرایکٹیو کمپیوٹر ایپلیکیشنز‘ کو دیواروں پر پروجیکٹرز کی مدد سے بیم کیا۔ ان دیواروں پر حرکت نوٹ کرنے والے ’کائنیکٹ موشن سینسرز‘نصب ہیں۔ مائیکروسافٹ کی طرف سے یہ سینسرز اس کے گیمنگ کنسول ایکس باکس 360 کے لیے تیار کیے گئے ہیں۔ اس طرح اس اسمارٹ ہوم کے رہائشی محض اپنے ہاتھوں کی حرکت سے اپنے ارد گرد موجود چیزوں کو کنٹرول کرنے کے قابل ہو گئے ہیں۔ یہ بالکل ایک طرح کا جادو لگتا ہے۔

آپ تصور کریں کہ صبح جاگتے ہی بیڈ پر لیٹے لیٹے دیوار کی طرف ہاتھ کے اشارے سے نا صرف آپ الارم بند کر سکتے ہیں بلکہ ساتھ ہی ساتھ دن بھر کی مصروفیات دیکھنے کے لیے دیوار پر اس دن کی ڈائری بھی نمودار ہو جائے گی۔ اگر آپ کمرے کا ماحول بدلنا چاہتے ہیں تو ایک چھوٹے سے اشارے سے آپ کی دیواریں آپ کے اردگرد کا پورا منظر بدل دیں گی۔ چاہے آپ ایک مصروف شہر کی گلی کے نظارے سے لطف اندوز ہونا چاہتے ہوں یا خوبصورت ساحلی منظر سے، یہ سینری مکمل طور پر آپ کے کمرے کو گھیر لے گی اور صرف ویڈیو ہی نہیں بلکہ تمام تر صوتی اثرات کے ساتھ۔

اسپین کے دارالحکومت میڈرڈ میں مستقبل کے اس گھر کے بارے میں پریزنٹیشن دیتے ہوئے اس کے خالق ایون کوئرواس مونزکا کہنا تھا، ’’یہ پراجیکٹ ایک اسمارٹ ہوم کا کام کرتا ہوا پروٹو ٹائپ ہے۔ ہم نے گھر کے فزیکل ڈھانچے کے ساتھ ایک ڈیجیٹل لیئر یا تہہ شامل کر دی ہے۔ اس طرح لوگ مختلف اشاروں اور جسم کی حرکت کی مدد سے اس گھر سے انٹرایکٹ یعنی تعامل کر سکتے ہیں۔‘‘

کوئرواس نے یہ پراجیکٹ نومبر 2011ء میں شروع کیا تھا۔ انہوں نے یہ پروٹوٹائپ دراصل اپنے ہی اپارٹمنٹ میں تیار کیا ہے۔ ان کی ’’تِھنک بِگ فیکٹری‘‘ کے نام سے بنائی گئی ٹیم میں پانچ ماہرین تعمیرات اور انجینئرز شامل ہیں، جو دیگر ماہرین کے ساتھ مل کر مختلف پراڈکٹس اور ایپلیکیشنز تیار کرتے ہیں۔

کوئرواس نے اسمارٹ ہوم کے بارے میں تفصیلات بتاتے ہوئے کہا، ’’اس میں ایک بنیادی یا جنرل انٹرفیس ہے، جو لیونگ روم میں موجود ہے۔ یہ انٹرفیس آپ کے ہاتھوں کے اشاروں سے کام کرتا ہے۔ آپ دیوار سے دو میٹر کے فاصلے پر جا کر اور ہاتھ کے اشارے سے ایک طرح کے کرسر کو حرکت دے کر لائٹیں جلا یا بجھا سکتے ہیں، میوزک آن یا آف کر سکتے ہیں اور ایسی انٹرنیٹ سائٹس کھول سکتے ہیں، جو بعد میں آپ کو دوسری دیوار پر نظر آئیں گی۔‘‘

یہ گھر تیار کرنے والی ٹیم کی خواہش ہے کہ وہ ایسی مصنوعات یا گیجٹس تیار کریں، جن سے لوگ جس قدر ممکن ہو، قدرتی انداز سے انٹر ایکٹ کر سکیں۔ اس کے علاوہ ان کا یہ بھی منصوبہ ہے کہ ایک مکمل گھر تیار کرکے دینے کی بجائے لوگوں کو اس بات کی سہولت دی جائے کہ وہ اپنی مرضی کی سہولتیں اپنے گھر کے لیے منتخب کر کے انہیں خرید سکیں۔

اسمارٹ ٹوائلٹ

آج کے عہد میں جب ہر شعبے میں ٹیکنالوجی سے انقلاب برپا ہورہا ہے تو ٹوائلٹ اس معاملے میں کیسے پیچھے رہ سکتے ہیں۔ یہی وجہ ہے ـ’اسمارٹ ٹوائلٹ‘ بھی متعارف کرادیئے گئے ہیں۔ ایک امریکی کمپنی نے 'انٹیلی جنٹ ٹوائلٹ متعارف کروایا ہے، جس میں سراؤنڈ ساؤنڈ اسپیکرز، موڈ لائٹننگ اور وائس کنٹرول دیئے گئے ہیں۔ یہ اسمارٹ ٹوائلٹ صفائی اور ڈرائیر فنکشنز سے لیس ہے، اس میں اسپیکرز موجود ہیں جبکہ کمپنی کا وعدہ ہے کہ یہ پانی بچانے میں مؤثر ثابت ہوگا۔

کمپنی کے مطابق اس وقت اسمارٹ ہوم ٹیکنالوجی میں بہت زیادہ جدت ہوچکی ہے مگر ٹوائلٹ پر اب تک توجہ نہیں دی گئی تھی۔اس لیے انھیں یقین ہے کہ اس اسمارٹ ٹوائلٹ کی بدولت لوگوں کو اپنے باتھ روم کو جدید بنانے کا موقع ملے گا۔ کمپنی نے صرف اسمارٹ ٹوائلٹ ہی تیار نہیں کیے بلکہ اسمارٹ مرر، باتھ ٹب اور دیگر چیزوں کو بھی اسمارٹ ٹوائلٹ کا حصہ بنایا ہے۔

ہر ڈیوائس دن کے مختلف اوقات میں یا آپ کے مزاج کے مطابق بدلتی ہے یا روشنیوں کی رنگت بدل جاتی ہے۔ کمپنی کے مطابق یہ آپ کی جسمانی گھڑی سے مطابقت پیدا کرکے رات کو ایسی روشنی پیدا کرتی ہے جس سے نیند کا چکر متاثر نہ ہو۔

حالیہ دور میں اُبھرتے ہوئے ملکوں جیسے چین اور سنگاپور میں اسمارٹ سٹی ٹیکنالوجیز پر نسبتاً تیزی سے کام ہورہا ہے، جس کی دو وجوہات ہیں۔ اوّل تو یہ کہ ترقی یافتہ ملکوں کے دولت مند شہروں میں ترقی کی رفتار سست پڑرہی ہے۔ دوئم، ترقی پذیر ملکوں میں اسمارٹ سٹی ٹیکنالوجیز کو اپنانے کیلئے وسائل، دولت اور استعداد کے ساتھ پختہ ارادہ ہے اور اسمارٹ سٹی ٹیکنالوجیز کیلئے میدان بالکل خالی ہے۔ ترقی پذیر ممالک ٹیکنالوجی میں آنے والی جدت سے بھرپور فائدہ اٹھانے کیلئے پرعزم ہیں۔