کیا ڈونلڈ ٹرمپ ٹوئٹر پر واپس آئیں گے؟

26 اپریل ، 2022

امریکا کے سابق صدر ڈونلڈ ٹرمپ کا کہنا ہے کہ ٹوئٹر پر واپس آنے کا کوئی ارادہ نہیں چاہے ایلون مسک تاحیات پابندی ہٹا بھی دیں۔

امریکی میڈیا سے بات کرتے ہوئے ڈونلڈ ٹرمپ نے کہا کہ اگلے ہفتے سے میں اپنا ’ٹرتھ سوشل پلیٹ فارم‘ استعمال کرنا شروع کردوں گا۔

ان کا مزید کہنا تھا کہ میں ٹوئٹر پر نہیں جارہا بلکہ ’ٹرتھ‘ پر ہی رہنا چاہوں گا۔

انہوں نے یہ بھی کہا کہ ایلون ایک اچھا آدمی ہے، مجھے امید ہے کہ ایلون مسک ٹوئٹر میں بہتری لے آئے گا۔

خیال رہے کہ ڈونلڈ ٹرمپ کی جانب سے متعدد ٹوئٹس کی گئی تھیں جن میں انہوں نے کیپیٹل ہل پر حملہ کرنے والے لوگوں کو محبِ وطن کہہ کر پکارا تھا، جس کے بعد ٹوئٹر، فیس بک، انسٹاگرام اور دیگر تمام بڑے سوشل میڈیا پلیٹ فارمز نے ان پر پابندی لگا دی تھی۔

ٹرتھ سوشل کیا ہے؟

ایک برس قبل ڈونلڈ ٹرمپ پر تمام بڑے سوشل میڈیا پلیٹ فارمز کی جانب سے پابندی عائد کی گئی تھی تو سابق امریکی صدر نے اپنا سوشل میڈیا پلیٹ فارم شروع کرنے کا فیصلہ کیا تھا۔

ڈونلڈ ٹرمپ نے ’ٹرتھ سوشل‘ کے نام سے ایک ایپ معتارف کرائی تھی۔