ملک میں شدید گرمی، آج ہیٹ ویو کا خدشہ

شدید گرمی نے ملک کو اپنی لپیٹ میں لے رکھا ہے، کئی علاقوں میں آج ہیٹ ویو کا خدشہ ہے۔

محکمہ موسمیات نے بالائی اور وسطی سندھ کے علاوہ پنجاب کے بالائی، وسطی اور جنوبی علاقوں میں اور بلوچستان میں گرمی کی شدت معمول سے زائد رہنے کی پیش گوئی کی ہے۔

رپورٹس کے مطابق سندھ کے کچھ علاقوں میں درجہ حرارت 50 ڈگری تک پہنچنے کا خدشہ ہے، سبی میں 49، جیکب آباد، دادو، لاڑکانہ اور سکھر میں پارا 46 سے 48، خان پور، رحیم یار خان اور ڈیرا غازی خان میں 45 ڈگری تک پہنچنے کا امکان ہے۔

کراچی،درجہ حرارت کے ساتھ لوڈشیڈنگ میں بھی اضافہ

کراچی کے مختلف علاقوں میں اعلانیہ لوڈشیڈنگ کا دورانیہ 6 سے 12 گھنٹے تک پہنچ گیا، اس میں غیراعلانیہ آنکھ مچولی بھی شامل کرلیں تو کئی علاقے ایسے بھی ہیں جہاں 14 سے 16 گھنٹے بجلی نہیں ہوتی۔

محکمہ موسمیات کے مطابق کراچی ہیٹ ویو کی لپیٹ میں نہیں ہوگا، تیرہ اور چودہ مئی کو گرمی کی شدت زیادہ رہے گی۔

دوسری جانب طبی ماہرین نے شہریوں کو بلا ضرورت گھروں سے نہ نکلنے کی ہدایت کی ہے۔