فرمان الہی
نماز کے اوقات
صُوفی غلام مُصطفیٰ تبسم
نبیؐ ہمارے نبیؐ ہمارے
نبیؐ ہمارے نبیؐ ہمارے
وہ حق کی باتیں بتانے والے
وہ سیدھا رستہ دکھانے والے
وہ راہبر رہنما ہمارے
نبیؐ ہمارے، نبیؐ ہمارے
درود ان پر، سلام ان پر
بلند نبیوں میں نام اُن کا
فلک سے اونچا مقام اُن کا
ہمارے ہادی خدا کے پیارے
نبیؐ ہمارے، نبیؐ ہمارے
درود ان پر، سلام ان پر
انہی کی خاطر دمک رہے ہیں
انہی کے دم سے چمک رہے ہیں
زمیں کے ذرّے، فلک کے تارے
نبیؐ ہمارے، نبیؐ ہمارے
درود ان پر، سلام ان پر
انہی کی سرکار کے گدا ہیں
انہی کے دربار کے گدا ہیں
جہاں کے یہ تاجدار سارے
نبیؐ ہمارے، نبیؐ ہمارے
درود ان پر، سلام ان پر
وہ پیشواؤں کے پیشوا ہیں
وہ رہنماؤں کے رہنما ہیں
وہ سب سہاروں کے ہیں سہارے
نبیؐ ہمارے، نبیؐ ہمارے
درود ان پر، سلام ان پر
