فرمان الہی
نماز کے اوقات
برسلز (حافظ اُنیب راشد) یورپین یونین، بلجیم اور لکسمبرگ کیلئے پاکستانی سفیر ڈاکٹر اسد مجید خان سے پاکستان ڈیری اینڈ کیٹل فارمرز ایسوسی ایشن کے صدر شاکر عمر گجر نے ملاقات کی ہے اس ملاقات میں پاکستان میں ڈیری اور مقامی کیٹل فارمرز کی صورتحال پر تفصیلی غوروخوض کیا گیا۔ شاکر عمر نے سفیر پاکستان کو پاکستانی فارمرز کی ضروریات سے آگاہ کرتے ہوئے کہا کہ وہ یورپین یونین سے پاکستان میں بریڈ چینج اور دودھ کی کوالٹی کی مشینری حاصل کرنے میں تعاون حاصل کرنے میں کردار ادا کریں، کیونکہ پاکستان میں لوکل بریڈ کی پیداوار بوجوہ انتہائی کم رہ گئی ہے اور ہم اپنی مقامی ضروریات کو بھی پورا کرنے سے قاصر ہوتے جا رہے ہیں جس سے ہماری آنے والی نسلیں خوراک کی کمی کا شکار ہیں۔ دوسری جانب انہوں نے مطالبہ کیا کہ پاکستان کے چھوٹے ڈیری فارمر کو استحصال سے بچانے کیلئے ضروری ہے کہ اسے خشک دودھ مافیا سے بچایا جائے۔ جواب میں سفیر پاکستان نے شاکر عمر گجر کو یقین دلایا کہ وہ ان کے تحفظات کو نہ صرف حکومت تک پہنچائیں گے بلکہ پاکستانی فارمرز کیلئے یورپین یونین سے جو تعاون بھی ممکن ہوگا، اسے حاصل کرنے کی کوشش کی جائے گی۔ اس ملاقات میں برسلز میں تعینات ٹریڈ سیکرٹری رانا بلال خان اور محمد انیس بھی موجود تھے۔ یاد رہے کہ پاکستان ڈیری اینڈ کیٹل فارمرز ایسوسی ایشن کے صدر شاکر عمر پاک بینیلکس اوورسیز چیمبر آف کامرس کی دعوت پر برسلز آئے تھے۔
