اسٹریٹ کرائمز

29 نومبر ، 2022

اسٹریٹ کرائمز کی بڑھتی ہوئی صورتحال اس باب میں اسپیشلائزڈ فورس یا یونٹوں کے قیام کی ضرورت اجاگر کر رہی ہے۔ پاکستان کے سب سے بڑے شہر اور تجارتی مرکز کراچی کے بعض علاقوں میں دن کے وقت بھی پیدل چلنے والوں کو سنسان علاقوں بالخصوص بالائی پلوں پر سے گزرتے وقت لوٹے جانے کا خطرہ لاحق رہتا ہے جبکہ گاڑیوں اور موٹر سائیکل پر سوار افراد کو اچانک سامنے آنے والے پستول برداروں کا دھڑکا لگا رہتا ہے۔ اس قسم کے واقعات بڑے شہروں میں پہلے صرف موبائل فون چھیننے کی وارداتوں اور نقدی لوٹے جانے تک محدود تھے تاہم پچھلے برسوں کے دوران، بالخصوص رواں سال، رہزنوں کے ہاتھوں قتل کے واقعات تشویشناک صورت اختیار کر چکے ہیں۔ پیر کے روز شائع شدہ ایک خبر کے بموجب اب تک 100 کے قریب شہری اسٹریٹ کرمنلز کے ہاتھوں اپنی جانوں سے ہاتھ دھو بیٹھے ہیں۔ نوبت یہاں تک آپہنچی ہے کہ ایک طرف رہزنوں کے ہاتھوں عام لوگوں کے جاں بحق ہونےکی اطلاعات آ رہی ہیں دوسری طرف حال ہی میں ڈیفنس کے علاقے میں ملزم کی فائرنگ سے شاہین فورس کے ایک اہلکار کے جاں بحق ہونے کا واقعہ ریکارڈ پر آیا ہے۔ پولیس حکام کی جانب سے حال ہی میں شاہین فورس اور قبل ازیں ایک اور فورس بنانے کے جو اقدامات کئے گئے وہ شاید اس بنا پر نتیجہ آور نہیں ہوئے کہ تھانوں اور مختلف یونٹوں سے بلائے گئے اہلکار پنجاب کی ڈولفن فورس کی طرح اسٹریٹ کرائمز سے نمٹنے کی باقاعدہ تربیت سے پوری طرح لیس نہیں۔ صورتحال ہر گزرتے روز جس کیفیت کی طرف بڑھتی محسوس ہو رہی ہے اس کا تقاضا ہے کہ اسٹریٹ کرائمز سے نمٹنے کے لئے کراچی میں باقاعدہ تربیت اور ضروری آلات کے ساتھ خصوصی فورس ترتیب دی جائے اور دیگر شہروں میں بھی تربیت یافتہ اہلکاروں پر مشتمل یونٹ حسب ضرورت بنانے پر غور کیا جائے۔

اداریہ پر ایس ایم ایس اور واٹس ایپ رائے دیں00923004647998

تازہ ترین