جنوبی لندن میں ایلم گرین اسکول کے طلباء نے کلاس رومز کو آلودگی سے بچانے کیلئے آلات بنالئے

لندن (پی اے) لندن کی سب سے زیادہ آلودہ سڑکوں میں سے ایک کے قریب واقع اسکول کے طلباء نے اپنے کلاس رومز کے لئے فضائی آلودگی کے فلٹر بنالئے ہیں۔ جنوبی لندن کے لیمبتھ کے ایلم گرین اسکول کے طلباء نے کٹس کا استعمال کرتے ہوئے آلات بنائے جن پر تقریباً 200پونڈزکے اخراجات ہوئے ہیں۔ یہ اسکول ساؤتھ سرکلر روڈ سے تقریباً 45 میٹر کے فاصلے پر واقع ہے، جس میں پی ایم 2.5کی اعلی سطح پائی گئی ہے۔ سال 10کے طالب علم چارلی نے کہا کہ طلباء کلاس روم کو صاف ستھرا محسوس کرنا چاہتے ہیں۔ پی ایم 2.5فضائی آلودگی کا ایک پیمانہ ہے جو دمہ، دل کی بیماری اور پھیپھڑوں کے کینسر سمیت مختلف امراض سے متعلقہ ہے۔ طلباء نے کمپین گروپ ممز فار لنگز اور ناٹنگھم یونیورسٹی کے محققین کے ساتھ مل کر کم لاگت کے نظام کوتیار کیا۔ ہر کٹ، جسے کورسی۔ روزنتھل باکس کے نام سے جانا جاتا ہے، اس بات کو یقینی بنانے کے لیے سمارٹ ٹیکنالوجی کا استعمال کرتا ہے کہ فلٹریشن سسٹم صرف اس وقت کام کرتا ہے جب آلودگی کی سطح زیادہ ہو۔ اسے کوویڈ۔ 19وبائی مرض کے دوران ڈیزائن کیا گیا تھا، جس کا مقصد ان ڈور سیٹنگز میں ہوا سے چلنے والے وائرل ذرات کی سطح کو کم کرنا تھا۔ ایلم گرین میں 10 سال کی طالبہ ہارلی نے کہا کہ کٹس کو کلاس روم کو صاف ستھرا محسوس کرنے کے لیے بنایا گیا ہے اور اس لیے آپ کو اتنا بدمزاج محسوس نہیں ہوتا ہے، اس سے سیکھنے میں بھی مدد مل سکتی ہے۔ ایک اور طالب علم لوئی نے مزید کہاکہ یہ کلاس روم میں آلودگی کے مسئلے کو بھی اجاگر کر سکتا ہے، لوگوں کو اس سے زیادہ آگاہ کر سکتا ہے تاکہ وہ اسے روکنے کے لیے زیادہ کوشش کریں۔ آلودگی ایک ایسی چیز ہے جسے آپ باہر کی فضا سے منسلک سمجھتے ہیں لہذا آپ واقعی اسے کلاس روم میں ایک مسئلہ نہیں سمجھتے۔ ایلم گرین اسکول کی سائنس ٹیچر کیزیہ آفریئی نے کہا کہ آلات بنانے سے بچوں کی کلاس رومز میں ہوا کے معیار میں دلچسپی پیدا ہوئی ہے۔ انہوں نے مزید کہا کہ وہ یہ دیکھنے کے لیے متجسس ہیں کہ فضائی مانیٹر اس جگہ کے بارے میں کیا رپورٹ کریں گے جہاں وہ سیکھنے میں اتنا وقت گزارتے ہیں۔ 2021 میں سٹی ہال کے شائع کردہ اعداد و شمار کے مطابق، لندن کے 98 فیصد اسکول ایسے علاقوں میں ہیں جہاں ہوا کا معیار زہریلا سمجھا جاتا ہے، جبکہ دارالحکومت سے باہر یہ شرح24 فیصد ہے۔ فضائی آلودگی کی ضرورت سے زیادہ سطح پھیپھڑوں کی نشوونما کو روکتی ہے اور دائمی بیماریوں کو خراب کرتی ہے۔