فرمان الہی
نماز کے اوقات
نئی دہلی / کراچی (اے ایف پی/ نیوز ڈیسک) بھارتی وزیراعظم نریندر مودی کی بھارت میں گرفت مزید مضبوط ہوگئی ہے ، عام انتخابات سے چند ماہ قبل پانچ ریاستوں میں ہونے والے انتخابات میں حکمراں جماعت بی جے پی نے 3میں کامیابی حاصل کرلی ہے ، بی جے پی نے چھتیس گڑھ اور راجستھان اپوزیشن سے چھین لئے، مدھیا پردیش تاریخی اکثریت سے دوبارہ حاصل کرلیا جو کانگریس جماعت اور راہول گاندھی کیلئے بڑا دھچکاہے تاہم تلنگانہ میں کانگریس فاتح رہی اور بھارتیہ راشٹریہ سماتھی (بی آر ایس ) سیٹ بیک رہا اور وہ شکست کھا گئی۔ پانچویں ریاست میزورم میں ووٹوں کی گنتی آج (پیر کو) ہوگی ۔ بھارتی وزیراعظم نریندر مودی نے الیکشن فتح پر خطاب کرتے ہوئے کہا کہ 2024ء کے انتخابات میں دوبارہ آؤں گا ، آج کے نتائج ہیٹ ٹرک کی ابتدا ہے، 140 کروڑ بھارتیوں کو متحد رکھنا میری گارنٹی ہے۔ ادھر کانگریس رہنما راہول گاندھی نے کہا ہے کہ ہم تینوں ریاستوں کو مینڈیٹ عاجزی کیساتھ قبول کرتے ہیں تاہم نظریات کی جنگ جاری رہے گی۔ تفصیلات کے مطابق بھارت میں وزیراعظم نریندر مودی کی حکمران جماعت بھارتیا جنتا پارٹی نے آئندہ عام انتخابات کے سلسلے میں اہم پیشرفت کرتے ہوئے تین اہم ریاستوں میں کامیابی حاصل کر لی ہے۔ خبر رساں ایجنسی اے ایف پی کے مطابق نریندر مودی اور بھارتیا جنتا پارٹی کو لگاتار تیسری مرتبہ انتخابات میں فتح کے لیے فیورٹ تصور کیا جا رہا ہے اور نومبر میں ہونے والے الیکشنز میں پانچ میں سے تین ریاستوں میں کامیابی سے اس امر کو مزید تقویت ملی ہے۔ وزیراعظم کی جماعت نے اپوزیشن جماعتوں سے چھتیس گڑھ اور راجستھان کی ریاستوں کا کنٹرول چھین لیا اور مدھیا پردیش میں اپوزیشن کی جانب سے بھرپور مقابلے کے باوجود ایک آسان فتح حاصل کی۔ نتائج راہول گاندھی کی زیر سربراہی چلنے والی کانگریس کے لیے بہت بڑا دھچکا ہے جو ماضی میں کئی دہائیوں تک راج کرنے کے بعد اب عوام کا اعتماد حاصل کرنے میں مکمل ناکام رہی ہے۔ کانگریس نے ریاست تلنگانہ میں علاقائی جماعت بی آر ایس کو شکست دی لیکن ریاست میزورم میں ووٹوں کی گنتی پیر کو کی جائے گی۔ 10سال سے مسلسل حکمرانی کرنے کے باوجود مودی اب بھی عوام میں یکساں مقبول ہیں اور انہوں نے اکتوبر اور نومبر میں مختلف ریاستوں کا دورہ کر کے انتخابی مہم سے خطاب کیا جس میں لاکھوں افراد نے شرکت کی۔ ابھی ووٹوں کی حتمی گنتی ہونا باقی ہے لیکن بھارت کے الیکشن کمیشن نے اتوار کی شام اپنے بیان میں کہا ہے کہ بھارتیا جنتا پارٹی کو مدھیا پردیش کی 230 میں سے 163 نشستوں پر برتری حاصل ہے۔ راجستھان میں حکمران جماعت نے 115 نشستیں جیتیں اور اسے 199 نشستوں کے ایوان میں واضح برتری حاصل ہے جبکہ چھتیس گڑھ کی بھی 90 میں سے 54 نشستیں مودی کی جماعت کے نام ہو چکی ہیں۔
