جنوبی ایشیا کا ’منڈیلا‘ قاسم فکتوسیاسی قیدیوں کی امریکی فہرست سے غائب کیوں؟

امریکی محکمہ خارجہ نے حال ہی میں ایک عالمی رپورٹ جاری کی ہے جس میں کہا گیا ہے کہ ایک اندازے کے مطابق دنیا بھر میں 10 لاکھ افراد سیاسی قیدی کے طور پہ سلاخوں کے پیچھے بند ہیں۔

اس رپورٹ میں ایرانی وکیل اور نوبل امن انعام یافتہ خاتون نرگس محمدی جیسے کچھ افراد کے ناموں کا ذکر کیا گیا ہے جنہیں 9 سال کی سزا سنائی گئی ہے۔

اس میں چینی صوبے سنکیانگ سے تعلق رکھنے والے ایغور نسل کے ڈاکٹر گلشن عباس بھی شامل ہیں جنہیں 2019ء میں 20 سال قید کی سزا سنائی گئی تھی۔

مجھے اس رپورٹ میں روسی اپوزیشن لیڈر ولادیمیر کارا مرزا کا نام بھی ملا جنہیں یوکرین میں روس کی جنگ پر تنقید کرنے پر 25 سال قید کی سزا سنائی گئی تھی لیکن حیرت کی بات یہ ہے کہ مجھے اس رپورٹ میں کشمیری قیدی ڈاکٹر محمد قاسم فکتو کا نام نہیں ملا جو ہندوستانی جیلوں میں تین دہائیوں سے زیادہ وقت گزار چکے ہیں اور پچھلے چھ سال (2018-2024) قید تنہائی میں گزار چکے ہیں۔

ڈاکٹر محمد قاسم فکتو سب سے طویل عرصے قید کاٹنے والے سیاسی قیدیوں میں سے ایک ہیں جنہیں اکثر جنوبی ایشیا کا نیلسن منڈیلا کہا جاتا ہے۔

جنوبی افریقہ کے سابق صدر اور نوبل امن انعام یافتہ نیلسن منڈیلا نے 27 سال قید کی سزا کاٹی تاہم ڈاکٹر فکتو نے اب 31 سال قید کی سزا پوری کرلی ہے اور مستقبل قریب میں ان کی رہائی کے کوئی آثار نہیں ہیں۔

درحقیقت وہ ہندوستان میں عدالتی تشدد کی زندہ مثال ہیں۔ ان کی اہلیہ بھی 2018ء سے جیل کی سلاخوں کے پیچھے ہیں۔ ڈاکٹر فکتو نے 1990ء میں آسیہ اندرابی سے شادی کی۔

دونوں نے صرف تین سال ایک ساتھ گزارے،ڈاکٹر فاکتو کو 1993ء میں نوآبادیاتی پبلک سیفٹی ایکٹ کے تحت گرفتار کیا گیا تھا۔ دو بچوں کی ماں آسیہ اپنے شوہر کی گرفتاری کے بعد سرگرم کارکن بن گئیں، انہیں گزشتہ تین دہائیوں میں کئی بار گرفتار کیا گیا لیکن وہ 2018ء کے بعد کبھی جیل سے باہر نہیں آئیں، یہ جوڑا اب مختلف جیلوں میں قید ہے۔

کچھ ہندوستانیوں کو نیلسن منڈیلا اور ڈاکٹر فاکتو کے درمیان موازنہ پسند نہیں ہے، میں نے کامن ویلتھ کانفرنس کے دوران 1995ء میں نیوزی لینڈ میں منڈیلا سے ذاتی طور پر ملاقات کی تھی اور ان کی سوانح عمری ’Long Walk to Freedom‘ کو کئی بار پڑھا ہے۔

میں ڈاکٹر فاکتو سے کبھی نہیں ملا لیکن میں نے جیلوں میں لکھی ہوئی ان کی کچھ کتابیں پڑھیں۔ منڈیلا اور فکتو کے درمیان مشترکات تلاش کرنا آسان ہے۔

بہت کم لوگوں کو اب یاد ہوگا کہ نیلسن منڈیلا 1994ء میں جنوبی افریقہ کے پہلے سیاہ فام صدر بنے تھے۔ انہوں نے 2004ء میں سیاست سے ریٹائرمنٹ کا اعلان کیا لیکن وہ 2008ء تک امریکی حکومت کی دہشت گردوں کی واچ لسٹ میں شامل رہے۔

منڈیلا اور ڈاکٹر فاکتو دونوں کو اپنے سیاسی خیالات کی وجہ سے دہشت گردی اور سنگین غداری کے الزامات کا سامنا کرنا پڑا۔ دونوں نے آزادی اور انصاف کے لیے جدوجہد کی اور ان کے دشمنوں نے انہیں دہشت گرد قرار دیا۔

منڈیلا 27 سال جیل میں گزارنے کے بعد ایک بین الاقوامی کہانی بن گئے کیونکہ ان کی پارٹی افریقن نیشنل کانگریس (ANC) نے ان کی رہائی کے لیے ایک بین الاقوامی مہم شروع کی تھی۔

ڈاکٹر فاکتو نے 31 سال جیل میں گزارے ہیں لیکن ان کی رہائی کے لیے مہم چلانے کے لیے ان کی پشت پر کوئی سیاسی جماعت نہیں ہے۔ بھارت میں کسی بھی سیاسی جماعت نے کبھی بھی ان کے لئے منصفانہ ٹرائل کا مطالبہ نہیں کیا کیونکہ ایک ملک کا دہشت گرد دوسرے ملک کاحریت پسند ہے۔

ڈاکٹر فکتو کشمیریوں کی اکثریت کے لیے حریت پسند ہیں۔ پاکستان نے ہمیشہ کشمیریوں کے لیے خود ارادیت کے حق کی حمایت کی لیکن زیادہ تر پاکستانی ڈاکٹر فکتو سے واقف نہیں ہیں جنہوں نے نیلسن منڈیلا سے زیادہ جیلوں میں وقت گزارا۔ کسی بھی پاکستانی رہنما نے کبھی کسی بین الاقوامی فورم میں اپنے نام کا ذکر نہیں کیا۔

ڈاکٹر محمد قاسم فکتو 1967ء میں سری نگر کے ایک متوسط گھرانے میں پیدا ہوئے۔ ان کی عمر صرف 13 سال تھی جب ان کے والد کا انتقال ہو گیا۔ انہوں نے اپنی تعلیم جاری رکھی اور چھوٹی نجی ملازمتوں کے ذریعے کالج کے اخراجات کا بندوبست کیا۔ 1985ء میں کشمیر پولیس نے سب انسپکٹرز کی بھرتی کے لیے درخواستیں طلب کیں۔ فکتو سلیکشن ٹیسٹ میں شامل ہوئے اور پاس ہو گئے لیکن انہیں نوکری حاصل کرنے کے لیے 25،000 روپے رشوت کے طور پر ادا کرنے کو کہا گیا۔ ان کے پاس یہ پیسے نہیں تھے اور انہیں نوکری سے انکار کردیا گیا۔

انہوں نے 1987ء میں اسلامیہ کالج سری نگر سے بی کام کی ڈگری مکمل کی اور انسٹی ٹیوٹ آف کاسٹ اینڈ ورکس اکاؤنٹنٹس (ICWA) کی طرف سے پیش کردہ امتحان میں شرکت کی تیاری شروع کی۔

اس عرصے کے دوران ہندوستانی حکومت نے ریاست جموں و کشمیر میں نیشنل کانفرنس کے رہنما فاروق عبداللہ کو وزیراعلیٰ کے عہدے پر فائز کرنے کے لیے ایک دھاندلی زدہ الیکشن کا اہتمام کیا۔ سید علی شاہ گیلانی اور سید صلاح الدین جیسے کئی کشمیری رہنماؤں نے 1987ء کے ریاستی انتخابات میں حصہ لیا۔ بدقسمتی سے بھارتی فوج نے بے شرمی سے الیکشن میں دھاندلی کی۔ اس دھاندلی نے کشمیری نوجوانوں کو عسکریت پسندی کی طرف دھکیل دیا۔

سید صلاح الدین اور فکتو جیسے بہت سے نوجوانوں نے محسوس کیا کہ مسلح جدوجہد ہی ان کے لیے واحد آپشن رہ گئی ہے۔ فکتو نے آئی سی ڈبلیو اے کے امتحان میں شرکت کا اپنا منصوبہ ترک کردیا اور کشمیر یونیورسٹی سے اسلامک اسٹڈیز میں پی ایچ ڈی شروع کردی۔ انہوں نے ایک مقامی روزنامہ میں کالم لکھنا شروع کیا۔

انہیں سید صلاح الدین (جنہوں نے سری نگر سے الیکشن لڑا لیکن دھاندلی کی وجہ سے ہار گئے) کی قیادت میں حزب المجاہدین کا ترجمان مقرر کیا گیا۔

اکتوبر 1990ء میں فاکتو نے آسیہ اندرابی سے شادی کی۔ انہوں نے کبھی بھی مسلح کارروائیوں میں حصہ نہیں لیا لیکن وہ عسکریت پسندوں کے ترجمان تھے جنہیں حریت پسند کہتے تھے۔

انہیں 1993ء میں اپنی بیوی اور نوزائیدہ بچے محمد کے ساتھ گرفتار کیا گیا تھا اور 13 ماہ بعد ان کی اہلیہ اور بچے کو رہا کر دیا گیا لیکن انہیں پبلک سیفٹی ایکٹ کے تحت جیل میں رکھا گیا۔

مقبوضہ ریاست جموں کشمیر کے گورنر کے اس وقت کے مشیر لیفٹیننٹ جنرل ڈی ڈی سکلانی نے ڈاکٹر فاکتو سے 3 بار سرینگر کے ایک تفتیشی مرکز میں ملاقات کی اور انہیں انتخابات میں حصہ لینے کی پیشکش کی۔

ہندوستانی جنرل نے نہ صرف انہیں کامیابی کی یقین دہانی کرائی بلکہ انہیں اگلی ریاستی حکومت میں وزارت کی پیشکش کی۔ ڈاکٹر فاکتو نے ایک اور دھاندلی زدہ الیکشن میں حصہ لینے کے بدلے آزادی خریدنے سے انکار کردیا۔

جنرل سکلانی نے اپنی ریٹائرمنٹ کے بعد Kashmir Saga: A Bundle of Blunders کے نام سے ایک کتاب لکھی لیکن انہوں نے کبھی بھی ڈاکٹر فاکتو کے بارے میں پوری سچائی بتانے کی ہمت نہیں کی جنہیں ان کی نگرانی میں شدید تشدد کا نشانہ بنا کر خالی کاغذات پر دستخط کرنے پر مجبور کیا گیا۔ بالآخر ڈاکٹر فکتو کو ایک ہندو پنڈت ہردل ناتھ وانچو کے قتل میں ملوث کیا گیا۔

ڈاکٹر فاکتو کے خلاف کوئی ثبوت نہیں تھا سوائے اس اعتراف کے جو کچھ انٹیلی جنس حکام نے لکھا تھا۔ مارچ 1999ء میں انہیں مختصر مدت کے لیے ضمانت پر رہا کر دیا گیا۔

اس نے ایک مذہبی تنظیم مسلم دینی محاز کا آغاز کیا اور چند ماہ بعد انہیں دوبارہ گرفتار کرلیا گیا۔ جولائی 2001ء میں جموں کی TADA عدالت نے وانچو کے قتل کیس میں انہیں باعزت بری کردیا لیکن حکومت نے اس فیصلے کو سپریم کورٹ آف انڈیا میں چیلنج کیا۔ سپریم کورٹ نے TADA عدالت کے فیصلے کو کالعدم قرار دیتے ہوئے انہیں عمر قید کی سزا سنائی۔

انہیں 2002ء میں جموں کے تالاب تلو تفتیشی مرکز میں ایک اور ڈیل کی پیشکش کی گئی تھی۔ کچھ انٹیلی جنس افسران نے انہیں رہائی کی پیشکش کی اگر وہ 2002ء کے ریاستی انتخابات میں حصہ لینے پر راضی ہو جائیں تو انہیں رہا کر دیا جائے گا۔

اس پیشکش نے ایک بار پھر فکتو کی نظر میں دنیا کی سب سے بڑی جمہوریت کی ساکھ کو مجروح کیا۔ فاکتو نے ایک دفعہ پھر انکار کیا اور جیل میں رہنے کو ترجیح دی۔

ڈاکٹر فاکتو نے 2007ء میں اپنی عمر قید (14 سال) مکمل کی لیکن انہیں رہا نہیں کیا گیا۔ ہندوستانی حکام انہیں ’judicial violence‘ کے ذریعے سبق سکھانے کے لیے پرعزم تھے. 2012ء میں سپریم کورٹ آف انڈیا نے اعلان کیا کہعمر قید کا مطلب مجرم کی زندگی کے اختتام تک جیل میں رہنا ہے۔

یہ مخصوص فیصلہ انسانی حقوق کی خلاف ورزی تھا جس کا مقصد فکتو کو تاحیات جیل میں رکھنا تھا۔

انہوں نے 1993ء سے 2018ء کے درمیان مختلف جیلوں میں 15 سے زائد کتابیں لکھیں۔ آخر کار ان پر جیل کے اندر کتابیں پڑھنے اور لکھنے پر پابندی لگا دی گئی اور قید تنہائی میں ڈال دیا گیا۔

فکتو نے ثابت کیا کہ قلم بندوق سے زیادہ طاقتور ہے۔ انہوں نے مہاراجہ ہری سنگھ کے بارے میں ایک سوال اٹھایا جس نے 1947 میں بھارت کے ساتھ الحاق کی ایک دستاویز پر دستخط کیے تھے کہ کیا وہ کشمیری عوام کے منتخب نمائندے تھے ؟

انہوں نے مزید کہا کہ اگر ہری سنگھ کو ایسا فیصلہ لینے کا حق ہے تو جوناگڑھ کے حکمران کا کیا ہوگا جس نے پاکستان کے ساتھ الحاق کا اعلان کیا تھا لیکن ہندوستان نے اسے قبول نہیں کیا؟

ڈاکٹر فکتو نے اپنی کتابوں میں ایسے خیالات کا اظہار کیا جنہیں پاکستان میں کچھ لوگوں نے پسند نہیں کیا۔ انہوں نے تجویز پیش کی کہ کشمیری سیاسی تنظیموں بشمول حریت کانفرنس کو کسی بھی حکومت اور ایجنسی سے مالی مدد قبول نہیں کرنی چاہیے۔ اس کے بجائے انہیں مقامی طور پر فنڈز اکٹھے کرنے چاہئیں اور دہلی اور اسلام آباد کی انٹیلی جنس ایجنسیوں سے تمام تعلقات منقطع کرنے چاہئیں۔

انہوں نے نائن الیون سے پہلے کشمیر پر ایک کتاب لکھی اور پیشن گوئی کی کہ ایک دن پاکستانی حکومت کشمیر پر اپنے روایتی مؤقف سے یو ٹرن لے گی۔ وہ اس وقت درست ثابت ہوئے جب جنرل پرویز مشرف نے کشمیر پر چار نکاتی فارمولہ پیش کیا جو کشمیر پر اقوام متحدہ کی سلامتی کونسل کی قراردادوں کی خلاف ورزی تھا۔

آج ہندوستان میں بہت سے لوگ دہلی کے وزیراعلیٰ اروند کیجریوال کی گرفتاری سے مایوس ہیں۔ اپوزیشن لیڈر راہول گاندھی نے الزام لگایا کہ عام انتخابات سے چند ہفتے قبل کیجریوال کی گرفتاری وزیراعظم نریندر مودی کی طرف سے سیاسی انتقام اور قبل از انتخابات دھاندلی ہے۔ وہ بھول گئے کہ مودی نے دھاندلی کا فن ان کے مرحوم والد راجیو گاندھی سے سیکھا جنہوں نے 1987ء میں کشمیریوں کے خلاف فاروق عبداللہ کے حق میں دھاندلی کی تھی۔

افسوس کہ بھارت کی سیاسی جماعتیں 1987ء کے بعد ڈاکٹر فکتو، یاسین ملک اور شبیر شاہ سمیت کئی دوسرے کشمیری رہنماؤں پر جھوٹے مقدمات پر خاموش رہیں۔

اب کیجریوال اور راہول گاندھی کے لیے جعلی مقدمات کا سامنا کرنے کی باری ہے۔ بھارتی عدالتوں نے ڈاکٹر فکتو کو انصاف دینے سے انکار کر دیا اور اب وہ کیجریوال کے ساتھ بھی ایسا ہی ہو سکتا ہے۔

اگر مودی کے مخالفین حقیقی جمہوریت پر یقین رکھتے ہیں تو انہیں اعتراف کرنا ہوگا کہ دھاندلی اور ناانصافی دراصل کشمیر میں شروع ہوئی تھی اور انکی مجرمانہ خاموشی کی وجہ سے دہلی پہنچی۔

ہندوستانی اپوزیشن جمہوریت کے زوال سے بجا طور پر پریشان ہے لیکن وہ اس حقیقت سے انکار نہیں کر سکتے کہ ڈاکٹر فکتو اور یاسین ملک جیسے کشمیری قیدیوں کی حالت زار پر ان کی خاموشی نے مودی کو اپنے سیاسی مخالفین کے ساتھ مجرموں جیسا سلوک کرنے کی ترغیب دی۔

اب وقت آگیا ہے کہ نہ صرف کیجریوال بلکہ ڈاکٹر فکتو اور بہت سے دوسرے کشمیری قیدیوں کے ساتھ نا انصافی کے خلاف بھی آواز بلند کی جائے۔