لندن کی سڑکوں کے نیچے جیمز بانڈ کی جاسوسی سرنگیں جلد کھول دی جائیں گی

لندن (پی اے) لندن کی سڑکوں کے نیچے جیمز بانڈ کی جاسوسی سرنگیں جلد کھول دی جائیں گی۔ رپورٹ کے مطابق دارالحکومت میں سیاحوں کی توجہ کا ایک وسیع مرکز بنانے کے منصوبے کے تحت لندن کی سڑکوں کے نیچے سرنگوں کو جلد ہی عوام کے لئے کھولا جا سکتا ہے۔ ہائی ہولبورن کے نیچے چلنے والی تقریباً 8000مربع میٹر سرنگوں کو 1942 میں بلٹز کے دوران تحفظ فراہم کرنے کے لئے ہوائی حملے کی پناہ گاہ کے طور پر بنایا گیا تھا۔ بعد میں انہیں برطانوی جاسوسی تنظیم اسپیشل آپریشنز ایگزیکٹو کے گھر کے طور پر استعمال کیا گیا۔ بھولبلییا، جسے کنگس وے ٹنل کے نام سے جانا جاتا ہے، پہلے جیمز بانڈ ناول میں نمایاں ہے۔ یہ سرنگیں 1990کے بعد سے غیر استعمال شدہ ہیں۔ ان منصوبوں کی منظوری سٹی آف لندن کارپوریشن نے منگل کو دی تھی لیکن کیمڈن کونسل کو ابھی بھی انہیں منظور کرنا ہے۔ تاریخ اور ورثے کا ایک حصہ تاریخی ٹائم لائن کے ذریعے برقرار رکھے ہوئے اور بحال کئے گئے ٹیلی کمیونی کیشن آلات کو دکھا کر سائٹ کی تاریخ کو درست کرے گا۔ ان منصوبوں میں تعلیمی سہولیات، نمائش کی جگہیں اور زیر زمین بار بھی شامل ہیں۔ جمع کرانے والے نوٹ میں کہا گیا ہے کہ سرنگوں کو جیمز بانڈ جیسے موضوعات پر نمائشوں کی میزبانی کے لئے بھی استعمال کیا جا سکتا ہے۔ منصوبے کے پس پشت لوگوں کے مطابق توقع ہے کہ اس جگہ میں ایک وقت میں سیکڑوں لوگوں کو ایڈجسٹ کیا جا سکے گا، جس کے نتیجے میں ہر سال علاقے میں تقریباً 60ملین پاؤنڈزسے 80ملین پاؤنڈز کےاضافی اخراجات ہوں گے۔ لندن کے اسکولوں میں بھی مفت وزٹ کی پیشکش کی جائے گی، جہاں سے ہر ہفتے کم از کم 40 بچوں کی آمد متوقع ہے۔ لندن ٹنلز کے چیف ایگزیکٹو اینگس مرے نے اس تجویز کو موجودہ اثاثے کی بحالی قرار دیا ہے۔ انہوں نے کہا کہ ایک زبردست کہانی سنائی جائے گی، جس میں لندن بلٹز کی کہانی بھی شامل ہے۔ انہوں نے مزید کہا کہ یہ منصوبہ مالی فوائد فراہم کرے گا اور سٹی پلان 2040اور ڈیسٹی نیشن سٹی جیسے شہر کے مقامی منصوبوں کے ساتھ ہم آہنگ ہوگا۔ کیمڈن کونسل جولائی میں درخواست کی سماعت کرنے والی ہے۔