-
فرمان الہی
-
نماز کے اوقات
- جمعرات 9؍صفر المظفر 1446ھ 15؍ اگست 2024ء
- بانی: میرخلیل الرحمٰن
- گروپ چیف ایگزیکٹووایڈیٹرانچیف: میر شکیل الرحمٰن
فرمان الہی
نماز کے اوقات
سفارت خانہ پاکستان برسلز میں پاکستان کا یوم آزادی بھرپور جذبہ حب الوطنی کے ساتھ منایا گیا۔
اس موقع پر یورپی یونین، بیلجیئم اور لکسمبرگ میں پاکستان کی سفیر آمنہ بلوچ نے قومی ترانے کی دھن پر پاکستان کا قومی پرچم لہرایا اور تقریب میں صدر مملکت، وزیراعظم اور نائب وزیراعظم پاکستان کے پیغامات پڑھ کر سنائے گئے۔
ان پیغامات میں ملکی قیادت نے پاکستان کے بانیوں کو شاندار خراج تحسین پیش کیا۔
انہوں نے ترقی پسند، پُرامن اور خوشحال پاکستان کے لیے قائداعظم محمد علی جناح کے وژن کو عملی جامہ پہنانے کے لیے اپنے غیر متزلزل عزم کا اعادہ بھی کیا۔
اس موقع پر سفیر پاکستان آمنہ بلوچ نے اپنے خطاب میں قائداعظم اور ڈاکٹر علامہ محمد اقبال کی لازوال میراث کی عکاسی کرتے ہوئے یوم آزادی کی اہمیت پر روشنی ڈالی۔
انہوں نے آج کی دنیا میں ان کے وژن کی مطابقت پر زور دیا اور ایک مضبوط قوم کی تعمیر کے لیے اتحاد، محنت اور لگن کی ضرورت پر زور دیا جو چیلنجوں سے نمٹنے کے لیے رہنما اصول ہیں۔
سفیر پاکستان نے بیلجیئم اور لکسمبرگ میں مقیم پاکستانیوں کے تعاون کو بھی سراہا اور یورپ کے ساتھ پاکستان کے تعلقات کو مضبوط بنانے میں ان کے کردار کا اعتراف کیا۔
تقریب کے ایک حصے کے طور پر سفارت خانے نے آموں کے ایک میلے کی میزبانی بھی کی جس میں آموں کی مختلف اقسام کی نمائش کی گئی اور پاکستان کے عالمی تجارتی تعلقات کو فروغ دینے میں ان کے کردار پر روشنی ڈالی گئی۔
اس تقریب نے ناصرف ملک کی آزادی کا جشن منانے کے لیے ایک پلیٹ فارم فراہم کیا بلکہ ایک ثقافتی پل کا کام بھی کیا جس سے پاکستان کی خوبصورتی کو بین الاقوامی سامعین تک پہنچایا گیا۔
یوم آزادی کی اس تقریب میں ہر شعبہ زندگی سے تعلق رکھنے والے افراد نے کثیر تعداد میں شرکت کی جن میں بیلجیئم اور لکسمبرگ میں مقیم پاکستانی کمیونٹی کے ارکان، مقامی معززین، سفارت کار اور صحافی شامل تھے ۔
یوم آزادی کا یہ جشن پاکستانی کمیونٹی کے اندر اتحاد اور ثقافتی تنوع کا حقیقی عکاس تھا جس میں خاندانوں، خواتین، بچوں اور طلبہ نے بھرپور شرکت کی۔ تقریب کے اختتام پر حاضرین کی حلوہ پوری اور چنے والے روایتی پاکستانی کھانے سے تواضع کی گئی جسے حاضرین نے خوب سراہا۔
