محکمہ موسمیات نے سمندری طوفان سے متعلق پانچواں الرٹ جاری کردیا

30 اگست ، 2024

جمعہ کو بچے کلفٹن کے ساحل پر کھیلتے نظر آ رہے ہیں، محکمہ موسمیات سمندری طوفان کے حوالے سے پانچواں الرٹ جاری کرچکا ہے(تصویر سوشل میڈیا)۔

بحیرہ عرب میں سمندری طوفان کے حوالے سے محکمہ موسمیات نے پانچواں الرٹ جاری کر دیا۔ جس کے مطابق سمندری طوفان بحیرہ عرب کے شمال مشرق میں موجود ہے۔

محکمہ موسمیات کے مطابق 6 گھنٹوں کے دوران سمندری طوفان مغرب کی جانب بڑھ رہا ہے، طوفان کراچی کے جنوب سے 120 کلومیٹر دور ہے جبکہ ٹھٹھہ کے جنوب مغرب سے طوفان 180 کلومیٹر کے فاصلے پر ہے۔

محکمہ موسمیات کا کہنا ہے کہ عمان کے جنوب مشرق سے طوفان 250 کلومیٹر دور ہے اور گوادر کے مشرق اور جنوب مشرق سے طوفان 440 کے فاصلے پر ہے۔

یہ بھی پڑھیے

محکمہ موسمیات کے مطابق طوفان مغرب اور شمال مغرب کی جانب حرکت کر رہا ہے۔ کراچی میں طوفان کے زیر اثر 31 اگست تک وقفے وقفے سے تیز بارش کا امکان ہے، جبکہ بدین، ٹھٹھہ، سجاول، حیدر آباد، ٹنڈو محمد خان اور دیگر اضلاع میں تیز ہواؤں چل سکتی ہیں۔

محکمہ موسمیات کے مطابق اس دوران 60 سے 70 کلومیٹر فی گھنٹے کی رفتار سے ہوائیں چل سکتی ہیں اور 80 کلومیٹر فی گھنٹےکی رفتار سے ہواؤں کے جھکڑ چل سکتے ہیں۔ طوفان کے دوران سمندر میں شدید طغیانی رہ سکتی ہے۔

ماہی گیروں کو 31 اگست تک گہرے سمندر میں جانے سے روکا گیا ہے، بلوچستان کے ماہی گیر یکم ستمبر تک گہرے سمندر میں نہ جائیں، یکم ستمبر تک بلوچستان کے مختلف اضلاع میں تیز ہواؤں اور گرج چمک کے ساتھ بارش کا امکان ہے۔

قومی خبریں سے مزید