پی ٹی آئی کے گرفتار ایم این ایز پارلیمنٹ لاجز سب جیل سے رہا، گھروں کو روانہ

پاکستان تحریک انصاف (پی ٹی آئی) کے گرفتار ایم این ایز کو پارلیمنٹ لاجز سب جیل سے رہا کردیا گیا، جس کے بعد وہ اپنے گھروں کو روانہ ہوگئے۔

سب جیل سے رہائی پانے والوں میں شیخ وقاص اکرم، شیر افضل مروت اور عامر ڈوگر شامل ہیں، جبکہ پی ٹی آئی رہنما زین قریشی، مولانا نسیم شاہ، احمد چٹھہ، یوسف خان اور احد شاہ کو بھی رہا کردیا گیا ہے۔

پی ٹی آئی رہنما شعیب شاہین کو اڈیالا جیل سے رہا کر دیا گیا

پی ٹی آئی رہنما شعیب شاہین تھانہ سنگجانی میں درج مقدمہ میں گرفتار تھے، انہیں اڈیالہ جیل منتقل کیا گیا تھا۔

یاد رہے کہ گزشتہ دنوں اسپیکر قومی اسمبلی سردار ایاز صادق نے گرفتار ارکان کی درخواست پر پارلیمنٹ لاجز کو سب جیل قرار دینے کی منظوری دی تھی۔

جس کے بعد پی ٹی آئی کے گرفتار اراکین قومی اسمبلی کو پارلیمنٹ لاجز میں رکھاگیا تھا، پارلیمنٹ لاجز کو سب جیل قرار دینے کا نوٹیفکیشن بھی جاری کر دیا گیا تھا۔

پاکستان تحریک انصاف (پی ٹی آئی) کے رہنماؤں کو 9 ستمبر کو گرفتار کیا گیا تھا۔