فرمان الہی
نماز کے اوقات
کراچی(اسٹاف رپورٹر)صوبائی محکمہ تعلیم سندھ نے آئندہ تعلیمی سیشن 2025یکم اپریل سے شروع کرنے کا فیصلہ کرتے ہوئے موجودہ سیشن کا نصاب25فیصد کم کر دیا ہے اور رواں تعلیمی سال سے 2024کے پہلی جماعت سے جماعت ہشتم کے امتحانات کے علاوہ میٹرک اور انٹرمیڈیٹ کے سالانہ امتحانات بھی صرف 75 فیصد نصاب سے لینے کا فیصلہ کیا ہے۔
یہ فیصلہ سندھ میں تعلیمی سال یکم اگست سے یکم اپریل کیے جانے کے تناظر میں کیا گیا ہے۔
سندھ پروفیسرز اینڈ لیکچررز ایسوسی ایشن (سپلا) کے مرکزی صدر پروفیسر منور عباس اور سیکریٹری جنرل غلام مصطفیٰ کاکا نے اسٹیرنگ کمیٹی کی سب کمیٹی کے فیصلوں پر حیرت کا اظہار کرتے ہوئے کہا کہ ان کے فیصلے زمینی حقائق کے برعکس ناقابل فہم اور ناقابل عمل ہیں۔
فیصلہ کرنے والوں کو معلوم ہی نہیں کہ انٹر کی کلاسز کب شروع ہوئی نصاب کی کیا صورتحال ہے اور نصاب ختم کب ہوگا۔ سپلا کے رہنماؤں کا مزید کہنا تھا کہ انٹرمیڈیٹ کے نصاب کو کم کرنے کی قطعا ضرورت نہیں ہے۔ اس لیے کہ انٹرمیڈیٹ کا نصاب مارچ کے اختتام پر ختم ہو جائے گا۔
سپلا کے رہنماؤں نے کہا کہ فیصلہ کرنے سے پہلے اسٹیک ہولڈرز کو شامل کرنا بہت ضروری ہے ورنہ اسی طرح کے بے ہنگم فیصلے ہی ہوں گے۔
سپلا کے رہنماؤں نے اپریل کے مہینے میں انٹرمیڈیٹ کے امتحانات کے انعقاد کے فیصلے کو خوش آیند قرار دیتے ہوئے کہا کہ سپلا کا یہ دیرینا مطالبہ تھا کہ امتحانات کو شدید گرمیوں کے بجائے معتدل موسم میں لیا جائے۔
محکمہ تعلیم سندھ کی اسٹیئرنگ کمیٹی کی ضمنی کمیٹی میں فیصلہ کیا گیا ہے جس کے باقاعدہ روداد بھی 5 دسمبر کو جاری کر دی گئے ہیں۔
