فرمان الہی
نماز کے اوقات
بھارتی فلم اور ٹی وی کی معروف اداکارہ اور نیٹ فلکس رئیلٹی شو شاندار زندگی بمقابلہ بالی ووڈ بیویاں نیلم کوٹھاری سونی نے کہا ہے کہ فواد خان کی مداح ہوں۔
نیلم کوٹھاری نے امریکا کے شہر ڈیلس میں منعقدہ ایک چیریٹی ایونٹ میں شرکت کی جہاں انہوں نے حاضرین سے ملاقات کی اور ان کے سوالات کے جوابات بھی دیے۔
اس ایونٹ کا انعقاد 3Sixty Entertainment کی جانب سے کیا گیا تھا۔
ایونٹ کے دوران ایک پاکستانی نژاد امریکن نے نیلم سے پوچھا کہ بھارتی عوام پاکستانی ڈراموں کو کیوں پسند کرتے ہیں اور اگر انہیں کسی پاکستانی اداکار کے ساتھ کام کرنے کا موقع ملے تو وہ کسے ترجیح دیں گی؟
اس پر نیلم نے خوش گوار انداز میں جواب دیا کہ شاید پاکستانی ڈراموں کی کامیابی کی وجہ ان کی دلکش کہانیاں اور جذبات کی گہرائی ہے، اداکاروں کی بہترین کارکردگی اور حقیقت پسندانہ مکالمے بھی انہیں منفرد بناتے ہیں۔
نیلم نے انکشاف کیا کہ وہ خود بھی کئی پاکستانی ڈرامے دیکھ چکی ہیں اور کہا کہ میں فواد خان کی مداح ہوں، وہ بہترین اداکار ہیں۔
نیلم کوٹھاری نے اپنے مشہور نیٹ فلکس رئیلٹی شو Fabulous Lives vs Bollywood Wives کے بارے میں دلچسپ انکشافات بھی کیے۔
انہوں نے بتایا کہ شو کا آئیڈیا کرن جوہر کا تھا، جو ایک چارٹرڈ فلائٹ کے سفر کے دوران ان کے ذہن میں آیا۔
نیلم نے ہنستے ہوئے کہا کہ ہم خواتین فلائٹ میں ڈریسنگ اور فیشن کی باتوں میں مگن تھیں، تب کرن نے کہا تم سب پاگل ہو، وہیں سے شو کا تصور پیدا ہوا۔
نیلم نے اعتراف کیا کہ رئیلٹی شو کرنا آسان نہیں ہوتا کیونکہ کچھ بھی پہلے سے طے شدہ نہیں ہوتا۔
انہوں نے کہا کہ رئیلٹی شو میں سب کچھ حقیقی ہوتا ہے لیکن ایڈیٹنگ کے ذریعے کہانی کو بہتر انداز میں پیش کیا جاتا ہے۔
نیلم کوٹھاری نے آخر میں کہا کہ یہ شو میری زندگی کا اہم حصہ بن گیا ہے اور میں ہمیشہ کرن جوہر کی شکر گزار رہوں گی کہ انہوں نے ہمیں یہ موقع فراہم کیا۔
