فرمان الہی
نماز کے اوقات
اسلام آباد(مہتاب حیدر)ورلڈ بینک نے اگلے 10 سالوں کے دوران 20 ارب ڈالر کی مالی امداد کے لیے کنٹری پارٹنرشپ فریم ورک (CPF) پر عمل درآمد کے حوالے سے صوبوں کے ساتھ مشاورت کی ہے۔ورلڈ بینک کے نائب صدر برائے جنوبی ایشیا، مسٹر مارٹن ریزر نے پاکستان کے پانچ روزہ دورے کے دوران منگل کو اپنی ملاقاتوں کا اختتام کیا اور پاکستان میں ترقی اور شمولیتی ترقی کو فروغ دینے کے لیے ورلڈ بینک کی مسلسل حمایت کا اعادہ کیا۔دورے کے دوران، وزیر اعظم پاکستان محمد شہباز شریف اور نائب صدر مسٹر ریزر نے پاکستان کنٹری پارٹنرشپ فریم ورک (CPF) برائے مالی سال 2026-35 کا باضابطہ طور پر آغاز کیا۔ یہ فریم ورک آئندہ دہائی کے دوران ورلڈ بینک گروپ اور پاکستان کے درمیان تعاون کے اسٹریٹجک فوکس ایریاز کی وضاحت کرتا ہے۔مسٹر ریزر نے پنجاب کے وزیر اعلیٰ محترمہ مریم نواز شریف اور خیبر پختونخوا کے وزیر اعلیٰ جناب علی امین گنڈاپور سے بھی ملاقات کی، جہاں انہوں نے CPF کے نفاذ کے لیے مخصوص منصوبوں پر بات چیت کی۔مسٹر ریزر نے کہا، ’’ورلڈ بینک گروپ کا کنٹری پارٹنرشپ فریم ورک ہماری شراکت میں ایک اہم پیش رفت ہے۔ یہ حکومت کے قومی اقتصادی تبدیلی کے منصوبے ’اُڑان پاکستان‘ کے ساتھ ہم آہنگ ہے اور اس میں 10 سال کے واضح، ٹھوس اور بلند عزائم کے حامل اہداف شامل ہیں۔
