فرمان الہی
نماز کے اوقات
سیدہ علیزہ سلطان نے سنگل پیرنٹ ہونے کی مشکلات پر اظہار خیال کرتے ہوئے کہا ہے کہ سنگل پیرنٹ ہونا بے حد مشکل ہے، آپ کو ماں اور باپ دونوں کا کردار ادا کرنا پڑتا ہے۔
معروف اداکار فیروز خان اور سیدہ علیزہ سلطان کی شادی کا اتار چڑھاؤ ہمیشہ خبروں کی زینت بنا رہا، دونوں کے درمیان طلاق اور بچوں کی حوالگی کا معاملہ بھی طویل عرصے تک میڈیا کی سرخیوں میں رہا۔
ان کے دو بچوں، فاطمہ اور سلطان کی حوالگی کے کیس نے ہر روز خبروں میں جگہ بنائی، آخر کار عدالت نے دونوں کے درمیان بچوں کی پرورش کی ذمہ داریاں بانٹ دیں اور اب دونوں والدین مشترکہ طور پر بچوں کی دیکھ بھال کر رہے ہیں۔
حال ہی میں سیدہ علیزہ سلطان نے ایک پروگرام میں شرکت کی، جہاں انہوں نے سنگل پیرنٹ ہونے کے چیلنجز اور مشکلات کے بارے میں کھل کر بات کی۔
علیزہ نے بتایا کہ بچے زیادہ تر ان کے پاس رہتے ہیں، تاہم وہ بچوں کو وقتاً فوقتاً والد سے ملاقات اور قیام کے لیے بھیجتی رہتی ہیں۔
علیزہ نے اپنی گفتگو میں کہا کہ سنگل پیرنٹ ہونا بے حد مشکل ہے، آپ کو ماں اور باپ دونوں کا کردار ادا کرنا پڑتا ہے، بعض اوقات ایسی چیزیں کرنی پڑتی ہیں جو شاید آپ کے بس میں نہیں ہوتیں، لیکن آپ کو ہمت دکھانی پڑتی ہے، یہ ایک بڑی ذمہ داری ہے اور میں اللّٰہ کی شکر گزار ہوں کہ میرے خاندان نے میرا بھرپور ساتھ دیا۔
انہوں نے کہا کہ میں اس مشکل وقت میں اپنے خاندان کی حمایت پر بہت مشکور ہوں، اگر خاندان کا ساتھ نہ ہوتا تو شاید اکیلے بچوں کی پرورش کرنا اور زندگی کے مسائل سے نمٹنا مزید مشکل ہو جاتا۔
علیزہ نے کہا کہ زندگی کا سب سے بڑا مقصد اب اپنے دونوں بچوں کی بہترین پرورش اور ان کی خوشحال زندگی ہے، اپنی زندگی میں آنے والے تمام چیلنجز کا سامنا کرتے ہوئے اپنے بچوں کو بہترین مستقبل فراہم کرنے کے لیے پُرعزم ہوں۔
سیدہ علیزہ سلطان کی کھری اور جذباتی گفتگو نے مداحوں کے دلوں کو چھو لیا، سوشل میڈیا پر ان کے حوصلے اور ہمت کی تعریف کی جا رہی ہے، مداحوں نے انہیں مضبوط اور خود مختار خاتون قرار دیا ہے۔
