فرمان الہی
نماز کے اوقات
کراچی (اسٹاف رپورٹر) وزیرِاعلیٰ سندھ مراد علی شاہ نے کہا کہ پاک بھارت جنگ میں پاک فوج نے بڑی بہادری سے دشمن کو شکست دی۔
مراد علی شاہ نے آرٹس کونسل آف پاکستان کراچی کے زیرِ اہتمام تین روزہ ’آرٹس المنائی فیسٹیول 2025ء‘ کے دوسرے روزخصوصی شر کت کی۔
پروگرام کا آغاز تلاوتِ کلام پاک سے کیا گیا، فیسٹیول میں پاکستان کا قومی ترانہ بجایا گیا جس کے احترام میں ہال میں موجود تمام لوگوں نے کھڑے ہوکر قومی ترانہ سنا، فیسٹیول میں پاک بھارت جنگ کے شہداء کو خراجِ تحسین پیش کیا گیا اور پاک فوج کی کامیابی کا جشن منایا گیا۔
انہوں نے کہا کہ آپس میں لڑنا بند کریں ہمارے دشمن بہت ہیں، آرٹس کونسل کے طلباء کا ملی جذبہ دیکھ کر بہت خوشی ہو رہی ہے، پاک بھارت جنگ میں پاک فوج نے بڑی بہادری سے دشمن کو شکست دی، فیسٹیول شہداءکے نام کرتا ہوں۔
اس موقع پر مراد علی شاہ نے اظہارِ خیال کرتے ہوئے کہا کہ آرٹس المنائی فیسٹیول 2025ء میں پرفارم کرنے والے تمام فنکاروں کو مبارکباد دیتا ہوں، احمد شاہ کا گزار ہوں کہ انہوں نے مجھے اس فیسٹیول میں دعوت دی، آج بہت اچھی پرفارمنسز دیکھنے کو ملیں، ہمارے شاعروں اور فنکاروں نے زبردست ٹریبیوٹ پیش کیا۔
انہوں نے کہا کہ ہماری پوری قوم بھارت کی جنگ سے اکٹھی ہوئی، 1965ء کی جنگ میں قوم کے جذبے کے بارے میں سنتے تھے مگر 2025ء میں وہ جذبہ دیکھنے کو ملا، 7 مئی کو پاکستان کے 4 مقامات پر حملہ کیا گیا جس میں ہمارے معصوم بچے شہید ہوئے۔
وزیرِاعلیٰ سندھ نے مزید کہا کہ ہماری ائیر فورس نے اس وقت فوری طور پر جواب دیا اور افواج پاکستان نے بھارت کے 5 جہاز گرائے جس میں رافیل بھی شامل تھے۔ بھارت نے اسرائیلی ڈرونز بھیجے، 10 مئی کو پاکستان پر دوبارہ حملہ ہوا تب آپریشن’بنیان مرصوص‘ وجود میں آیا۔
