فرمان الہی
نماز کے اوقات
بھارت کے یوم آزادی یعنی کشمیریوں کے یوم سیاہ کے موقع پر بلجیئم کے دارالحکومت برسلز میں بھارتی سفارتخانے کے سامنے آج بھرپور احتجاجی مظاہرہ کیا گیا۔
اس مظاہرے کا اہتمام کشمیر کونسل (ای یو) نے کیا تھا۔ جس کی قیادت کونسل کے چیئرمین علی رضا سید نے کی۔
یاد رہے کہ کشمیر کے دونوں حصوں میں موجود کشمیری اور دنیا کے دوسرے خطوں میں رہنے والے ان کے ہم وطن ہر سال 15 اگست بھارت کے یوم آزادی کو یوم سیاہ کے طور پر مناتے ہیں۔
مظاہرے میں شریک شخصیات میں سردار صدیق، چوہدری خالد جوشی، راؤ مستجاب احمد، ڈاکٹر منظور ظہور، ملک اجمل، شیراز بٹ، راجہ خالد، غیاث الدین بھٹی، سید اسلم شاہ، راجہ عبدالقیوم، شازیہ اسلم اور مہر ندیم قابل ذکر ہیں۔
مظاہرین نے پلے کارڈز اور بینرز اٹھا رکھے تھے جن پر کشمیریوں کے حق اور بھارتی مظالم کے خلاف نعرے درج تھے۔ احتجاج کرنے والوں نے بھارتی جیلوں میں قید حریت رہنماء یاسین ملک اور شبیر احمد شاہ اور انسانی حقوق کے عالمی شہرت یافتہ علمبردار خرم پرویز کی تصاویر بھی اٹھا رکھی تھیں اور مظاہرین تمام کشمیری اسیروں کی رہائی کا مطالبہ کر رہے تھے۔
کشمیر کونسل ای یو کے چیئرمین علی رضاسید نے اس موقع پر خطاب کرتے ہوئے کہا کہ ہم اس لیے احتجاج کر رہے ہیں کیونکہ بھارت نے کشمیریوں پر مظالم کی انتہاکر دی ہے۔
انہوں نے کہا کہ بھارت کئی دہائیوں سے کشمیر کے ایک بڑے حصے پر ناجائز طور پر قابض ہے۔ خاص طور پر گذشتہ چند سالوں سے مقبوضہ کشمیرکے عوام کے خلاف بھارتی ریاستی دہشت گردی میں اضافہ ہوا اور اسی وجہ سے مظلوم کشمیری گونا گوں مشکلات کا شکار ہیں، اہم سیاسی رہنماء اور انسانی حقوق کے کارکن نظر بند اور گرفتار ہیں۔
علی رضاسید نے کہا کہ بھارت کشمیریوں کی وسیع پیمانے پر نسل کشی کر رہا ہے اور نوجوانوں کو ماورائے عدالت قتل کیا جا رہا ہے۔ بھارت مقبوضہ وادی میں آبادی کا تناسب تبدیل کر کے کشمیریوں کی شناخت ختم کرنے کے درپے ہے۔
دیگر مقررین نے بھی اپنی تقاریر میں مقبوضہ کشمیر میں بھارتی ظلم و ستم کے خاتمے اور مسئلہ کشمیر کے منصفانہ حل کا مطالبہ کیا۔ انہوں عالمی برادری سے اپیل کی کہ وہ مقبوضہ کشمیر میں مظالم بند کروا کر مسئلہ کشمیر کے منصفانہ اور پرامن حل کے لیے کردار ادا کریں۔
