فرمان الہی
نماز کے اوقات
سندھ کے سینئر وزیر شرجیل میمن نے کہا ہے کہ حکومت سندھ نے ممکنہ سیلابی صورتحال سے نمٹنے کیلئے ہنگامی اقدامات کیے ہیں۔
کراچی سے جاری اپنے بیان میں شرجیل میمن نے کہا کہ تمام وزرا، منتخب نمائندے اور ضلعی انتظامیہ اپنے اپنے علاقوں میں موجود ہیں، عوام کے جان و مال کے تحفظ کو اولین ترجیح دی جا رہی ہے۔
انھوں نے کہا کہ صوبائی وزرا ناصر شاہ، جام خان شورو اور پوری کابینہ وزیراعلیٰ کی ہدایات پر اضلاع میں دورے کر رہی ہے، پشتوں کی مضبوطی، نگرانی اور عوامی سہولتوں کی فراہمی کے اقدامات کا جائزہ لیا جا رہا ہے۔
شرجیل میمن نے کہا ہر ضلع میں ڈپٹی کمشنرز، پولیس، آبپاشی اور ریسکیو ادارے الرٹ ہیں، گڈو، سکھر اور کوٹری بیراج پر پانی کی آمد اور اخراج کو مانیٹر کیا جا رہا ہے۔
انھوں نے کہا کہ اس وقت صورتحال قابو میں ہے، حکومت نے کسی بھی ہنگامی حالت سے نمٹنے کے لیے متبادل منصوبہ بندی کر رکھی ہے۔
شرجیل میمن نے کہا کہ چیئرمین بلاول بھٹو اور صدر آصف زرداری کی ہدایت ہے کہ عوام کے تحفظ کو ہرحال میں یقینی بنایا جائے، وزیراعلیٰ سندھ براہِ راست انتظامات کی نگرانی اور روزانہ بریفنگ لے رہے ہیں۔
