جنگ ستمبر: 1965 افواج پاکستان کی ناقابل تسخیر فتوحات

جنگ ستمبر 1965ء کی تاریخ میں بےپناہ اہمیت ہے۔ اس جنگ میں افواج پاکستان اور قوم کے جذبات اور یکجہتی کا تصور روح کو سرشار کردیتا ہے۔ لازوال قربانیوں کی داستانیں دلوں کو گرماتی، جوش وجذبے کو اُبھارتی اور ایمان ویقین کو تازہ کردیتی ہیں۔ 

ایک طرف جنگِ ستمبر کا تذکرہ دلوں کو گرماتا اور ایمان ویقین کو تازہ کردیتا ہے تو دوسری جانب لازوال قربانیوں کی داستانیں آنکھیں نم کردیتی ہیں۔ پاکستانی قوم اور افواج پاکستان وطن عزیز کے لیے جانوں کا نظرانہ پیش کرنااورشہادت کے رتبے پر فائز ہونے اعزاز سمجھتی ہے۔ 

پاکستان کی مسلح افواج ملک کی نظریاتی اور جغرافیائی حدود کے دفاع کی ذمہ دار ہیں اور وہ اپنے فرائض جانفشانی سے ادا کرتی آرہی ہیں۔ ہمارے جوانوں نے 1965ء کی جنگ میں دشمن کو ناکوں چنے چبواکر ہمت و بہاردی اور شجاعت واستقلال کی ایسی مثال قائم کی ہے، جس کی نظیر نہیں ملتی۔ تاریخ عالم میں پاکستان کو ناقابلِ تسخیر ثابت کرنے والی اس مسلح افواج کی 1965ء کی پاک بھارت جنگ میں حاصل کی جانے والی چند کامیابیوں کا ذکر کیا جارہا ہے۔

جنگ کی ابتدا

جنگ ستمبر1965ء کا سبب بھی بھارت کے زیرِ تسلط مقبوضہ کشمیر تنازعہ تھا۔ تقسیم ہند کے بعد سے ہی بھارت نے بین الاقوامی برادری کے سامنے کشمیر سے متعلق کیے گئے اپنے وعدوں کی خلاف ورزی کی اور مسلسل ایسے اقدامات کیے جو کشمیر کی بین الاقوامی سطح پر متنازعہ حیثیت کے بالکل برعکس تھے۔ 

ایک طرف بھارت کا بین الاقوامی برادری کے سامنے کشمیر میں استصواب رائے کا وعدہ تو دوسری جانب مقبوضہ کشمیر کو بھارت کے نندا کمیشن رپورٹ پر عملدرآمد کی صورت وفاقی ڈھانچے میں شامل کرکے بھارت کا اٹوٹ انگ قرار دینا اور پھر رن آف کچھ میں پاکستانی علاقے پربھارت کا حملہ، یہ تمام عوامل ایسے تھے جن کے باعث پاکستان کا جوابی رد عمل ہر صورت لازمی تھا۔

بھارتی جارحیت

21فروری1965ءکو بھارت نے پاکستانی ٹروپس کو کانجر کوٹ سے باہر نکالنے کا فیصلہ کیا جوکہ رن آف کچھ میں ایک بہت پرانا قلعہ اور پاک بھارت سرحد پر واقع ہے۔ اس مقام پر پاکستان سے پنجہ آزمائی کے دوران منہ کی کھانے کے بعد بھارت نے فیصلہ کیا کہ وہ اپنی اس شکست کا بدلہ لے گا۔ 

یوں 6ستمبر 1965ء کے روز بھارت نے رات کی تاریکی میں میجر جنرل نرنجن پرشاد کی قیادت میں ٹینکوں کے 25ویں ڈویژن اور توپ خانے کی مدد سے لاہور پر 3اطراف سے حملہ کردیا، دشمن یہ سوچ کر پاکستان پر حملہ آور ہوا تھا کہ لاہور پر قبضہ جمانے میں کامیاب ہوجائے گا۔ 

بھارتی جرنیل صبح کا ناشتہ لاہور میں کیے جانے کا سوچے بیٹھے تھے مگر انھیں کیا معلوم تھا کہ کچھ ہی دیرمیں پاک فوج کے جانباز انھیں تارے دکھانے والے ہیں۔ دشمن کے ناپاک عزائم خاک میں ملانے کے لیے پہلے پہل اس کے لاہور کی جانب بڑھتے قدم روکنے تھے، جس کے لیےستلج رینجرز کے نوجوانوں نے نہ صرف جانوں کے نذرانے پیش کیے بلکہ بی آر بی نہر کا پل تباہ کرکے دشمن کا لاہور میں پہنچنا ناممکن بنادیا، اس تمام تر صورتحال کو یقینی بنانا کسی طور معجزے سے کم نہ تھا۔

چونڈہ میں ٹینکوں کی لڑائی

تاریخ نویس ستمبر کی پاک بھارت جنگ میں چونڈہ (سیالکوٹ) میں لڑی جانے والی ٹینکوں کی لڑائی کو دوسری جنگ عظیم کے بعد ٹینکوں کی سب سے بڑی جنگ قرار دیتے ہیں۔ طاقت کے نشے میں چُور بھارت نے پاک فوج کی توجہ لاہور محاذ سے ہٹانے کے لئے600ٹینکوں اور ایک لاکھ فوج کے ساتھ سیالکوٹ میں چارواہ، باجرہ گڑھی اورنکھنال کے مقام پر حملہ کردیا۔ 

لیکن پاک فوج کے جوان اپنے جسموں پر بم باندھ کر ٹینکوں کے آگے لیٹ گئے اور چونڈہ کے محاذ کو دشمن کے ٹینکوں کا قبرستان بنادیا، سینکڑوں ٹینک ملبے کا ڈھیر بن گئے۔ چونڈہ کے مقام پر پاک فوج کی قیادت جنرل ٹکا خاں کررہے تھے، جنہوں نے ہمت وبہادری اور شجاعت کے ذریعے نہ صرف سیالکوٹ کو بچا لیا بلکہ بھارتی کمانڈروں کی جانب سے پاکستان کی لائف لائن جی ٹی روڈ کو کاٹنے کی خواہش بھی ناکام بنا دی۔

پاک فضائیہ کا تاریخی کردار

دوسری جانب ملکی دفاع کے لیے پاک فضائیہ کا جذبہ بھی کسی طور کم نہ تھا، پاک فضائیہ کے شاہینوں نے اس لڑائی میں لازوال کردار ادا کیا۔ پاک فضائیہ نے6ستمبرکو بھارت کے فضائی اڈوں پٹھان کوٹ، آدم پور اور ہلواڑہ پر بھر پور انداز میں حملے کئے۔ 

پٹھان کوٹ میں پاک فضائیہ نے بھارت کے دس طیارے تباہ کیے اور متعدد کو نقصان پہنچایا۔ 1965ء کی 17روزہ جنگ میں پاک فضائیہ کے بہادر سپوتوں کی بدولت پی اے ایف نے مجموعی طور پر 35طیاروں کو فضااور 43کو زمین پر تباہ کیا جبکہ 32بھارتی طیاروں کو طیارہ شکن گنوں نے نشانہ بنایا۔ اس طرح مجموعی طورپر بھارت کے 110طیارے تباہ ہو ئے اور پاکستان کے صرف 19طیارے اپنے ملک کے دفاع میں کام آئے۔

سمندری حدود کی تحفظ

جنگ کے آغاز کے دوسرے دن 7ستمبر کو اپنے ساحل کے دفاع کے لیے پاک بحریہ کے جنگی جہاز حفاظتی گشت پر مامور تھے کہ اس دوران نیول ہیڈکوارٹرز کی جانب سے ایک پیغام موصول ہوا، جس میں ہدایت کی گئی کہ جتنی تیزی سے ممکن ہو جنوبی دوارکا سے مغرب میں 120میل کی طرف بڑھیں اور شام 6بجے تک پوزیشن سنبھال لیں۔

دوارکا میں بھارتی بحریہ کا ریڈاراسٹیشن اور فضائی اڈہ تھا۔ پاک بحریہ نے دفاعی جنگ لڑنے کی بجائے جارحانہ حکمت عملی اپنانے کا فیصلہ کیا۔ ساڑھے چار منٹ تک مسلسل بمباری کرکے50،50راؤنڈز فائر کیے، مطلوبہ ہدف تباہ کیا اور دشمن کو سنبھلنے کا موقع ہی نہ دیا۔ اس کے علاوہ رن وے کو بھی مکمل طور پر تباہ کر دیا گیا، جب کہ انفرااسٹرکچر اور سیمنٹ فیکٹری کو بھی راکھ کا ڈھیر بنا دیا گیا۔