فرمان الہی
نماز کے اوقات
امریکا کے صدر ڈونلڈ ٹرمپ نے امریکی شہریوں کو بیرونی ممالک میں غیرقانونی طور پر حراست میں لیے جانے کے خلاف حکم نامے پر دستخط کردیے ہیں جس کے تحت ان سرگرمیوں میں ملوث غیرملکی حکومتوں کے خلاف سخت اقدامات کیے جاسکیں گے اور ممالک کو بلیک لسٹ میں ڈالا جاسکے گا۔
امریکی محکمہ خارجہ کے مطابق صدارتی حکم نامہ امریکی وزیر خارجہ کو اختیار دیتا ہے کہ وہ امریکہ کے شہریوں کی غیرقانونی حراستوں میں ملوث ہونے یا اس میں مدد دینے والے کسی بھی ملک کو غیر قانونی حراست کے ریاستی سرپرست کے طور پر نامزد کر سکتے ہیں۔
اِس حکمنامے میں وزیر خارجہ کو ہدایت کی گئی ہے کہ وہ نامزد کردہ ممالک کے حوالے سے تمام موزوں اقدامات اٹھائیں جن میں پابندیاں، ان ممالک کے شہریوں کا امریکہ میں داخلہ روکنا، سفری پابندیاں، برآمدی پابندیاں اور موجودہ قوانین کے تحت دیگر اقدامات شامل ہیں جن کا مقصد غلط گرفتاریوں کو روکنا اور ایسے اقدامات کا جواب دینا ہے۔
یہ حکمنامہ وزیر خارجہ کو اجازت دیتا ہے کہ اگر کوئی غیرملکی حکومت غیرقانونی طور پر حراست میں لیے گئے امریکی شہریوں کو رہا کر دے، غیرقانونی حراست کے حوالے سے اپنی قیادت یا پالیسیوں میں تبدیلی لے آئے اور مستقبل میں ایسی خلاف ورزیوں سے باز رہنے کی قابل بھروسہ یقینی دہانی کرا دے تو وہ اس کی نامزدگی ختم کر سکتے ہیں۔
امریکی محکمہ خارجہ کے مطابق صدر ٹرمپ غیر ملکی مخالفین کی جانب سے امریکہ کی خودمختاری اور قیادت کو کمزور کرنے کے لیے غیرقانونی حراستوں کے دباؤ ڈالنے کے ایک ہتھکنڈے کے طور پر بڑھتے ہوئے استعمال کو روکنے کے لیے بھی اقدامات کر رہے ہیں۔
