فرمان الہی
نماز کے اوقات
ویتنام کے صوبہ نام دینھ سے تعلق رکھنے والے ایک مقامی فنکار نے اپنے غیر معمولی لمبے ناخنوں کی بدولت دنیا بھر میں شہرت حاصل کرلی، لیو کانگ ہوئیان نے 34 سال سے اپنے ناخن نہیں تراشے اور اب وہ دنیا کے سب سے لمبے ناخن رکھنے والے شخص قرار دیے گئے ہیں۔
گنیز ورلڈ ریکارڈز کے مطابق ان کے دونوں ہاتھوں کے ناخنوں کی مجموعی لمبائی 594.45 سینٹی میٹر (19 فٹ 6 انچ) ہے، جو ایک عام زرافے کی اونچائی سے بھی زیادہ ہے، ان کے بائیں ہاتھ کے ناخن 388.85 سینٹی میٹر جبکہ دائیں ہاتھ کے ناخن 205.6 سینٹی میٹر لمبے ہیں، سب سے لمبا ناخن ان کے بائیں انگوٹھے کا ہے جس کی لمبائی 127.5 سینٹی میٹر (4 فٹ 2 انچ) ہے۔
ہوئیان کا کہنا ہے کہ انہوں نے اپنے والد کے نقشِ قدم پر چلتے ہوئے یہ سفر شروع کیا تھا، ابتدا میں یہ قدم اپنی شخصیت کو زیادہ باوقار بنانے کے لیے اٹھایا، لیکن بعد میں یہ ان کی عادت اور پہچان بن گیا۔
انہوں نے بتایا کہ اگر میں اپنے ناخن تراش دوں تو مجھے ذہنی اور جسمانی طور پر تھکن اور بے سکونی محسوس ہوتی ہے، صرف تراشنے کا خیال ہی مجھے بیمار کر دیتا ہے۔
ہوئیان اپنے ناخنوں کی حفاظت کے لیے خاص طور پر محتاط رہتے ہیں، بارش میں وہ انہیں گیلا ہونے سے بچاتے ہیں کیونکہ پانی لگنے کی صورت میں وہ نرم ہو کر ٹوٹ سکتے ہیں، کپڑے بدلنے اور سونے کے دوران بھی وہ بے حد دھیان رکھتے ہیں تاکہ ناخن دب کر ٹوٹ نہ جائیں۔
دلچسپ بات یہ ہے کہ اتنے لمبے ناخنوں کے باوجود وہ فنِ مصوری میں مہارت رکھتے ہیں، وہ گھروں کی دیواروں پر خوبصورت پینٹنگز بناتے ہیں اور لوگ حیران رہ جاتے ہیں کہ اتنے لمبے ناخنوں کے ساتھ وہ اتنی نفاست سے برش کیسے چلاتے ہیں۔
ہوئیان کی بیوی تھی تھوآن بھی ان کے ساتھ بھرپور تعاون کرتی ہیں، ان کا کہنا ہے کہ اگر میری اہلیہ میرا ساتھ نہ دیتیں تو میں کبھی اپنے ناخن اس طرح برقرار نہ رکھ پاتا۔
