فرمان الہی
نماز کے اوقات
وفاقی وزیر اطلاعات عطا تارڑ نے کہا ہے کہ پاکستان نے اعجاز ملاح کو گرفتار کیا ہے، بھارتی خفیہ ایجنسی نے اعجاز ملاح کو اپنے لیے کام کرنے پر آمادہ کیا۔
اسلام آباد میں وزیر مملکت برائے داخلہ طلال چوہدری کے ہمراہ پریس کانفرنس کے دوران عطا تارڑ نے کہا کہ بھارت نے اعجاز ملاح کو آرمی، نیوی اور رینجرز کی وردیاں خریدنے کی ہدایت کی، جب اعجاز ملاح یہ وردیاں خرید رہا تھا تو پاکستانی ایجنسیوں نے اس کی نگرانی شروع کر دی۔
انہوں نے کہا کہ اعجاز ملاح کو بھارت جاتے ہوئے گرفتار کیا گیا۔
عطا تارڑ کا کہنا تھا کہ بھارت پاکستان کی معرکہ حق میں فتح اور سفارتی کامیابیوں سے پریشان ہے، آپریشن سندور کی ناکامی کے بعد بھارت نے جھوٹی مہمات شروع کیں۔
انہوں نے کہا کہ ملزم سے سم کارڈز، ماچس، لائٹرز اور دیگر اشیاء برآمد ہوئی ہیں، تحقیقات میں انکشاف ہوا کہ اعجاز ملاح کو بھارتی خفیہ ایجنسی نے مالی لالچ اور دباؤ کے ذریعے استعمال کیا۔
وفاقی وزیر کا کہنا ہے کہ بھارت کی پاکستان مخالف مہم اس کی سفارتی و عسکری ناکامیوں کا واضح ثبوت ہے، پاکستان عالمی سطح پر عزت و وقار حاصل کر رہا ہے، جسے بھارت برداشت نہیں کر پا رہا، بھارت نے گجرات اور کَچھ کے قریب فوجی مشقوں کی آڑ میں مذموم سرگرمیاں شروع کیں۔
عطا تارڑ نے کہا کہ بھارتی مشقوں کا مقصد پاکستان کے خلاف پروپیگنڈا اور تخریبی کارروائیاں تھا، بھارت نے فوجی مشقوں کو پاکستان مخالف پروپیگنڈا مہم سے جوڑنے کی کوشش کی، سیکیورٹی اداروں نے بھارتی خفیہ ایجنسی کی سازش ناکام بنائی۔
اس موقع پر گفتگو کرتے ہوئے وزیر مملکت برائے داخلہ طلال چوہدری نے کہا کہ بھارت کا پروپیگنڈا آپریشن ایکسپوز ہو گیا ہے، پاکستان کی سرزمین کسی کے خلاف استعمال نہیں ہوتی۔
طلال چوہدری کا کہنا ہے کہ ہم ہر جگہ مقابلہ کریں گے آپ کو بے نقاب کریں گے، جعفر ایکسپریس کی ویڈیو پہلے بھارت میں چلائی گئی۔
دوسری جانب اعجاز ملاح نے اعترافی بیان میں کہا ہے کہ بھارتی ایجنسیوں نے مجھے سمندر سے گرفتار کیا، بھارتی ایجنسیوں نے کہا کہ اگر ہمارے لیے کام نہ کیا تو جیل میں رہو گے۔
اعجاز ملاح نے کہا کہ بھارتی ایجنسی نے مجھے فوج کی وردیاں، موبائل سمز اور فون بلز وغیرہ لانے کی ہدایت دی۔
