فرمان الہی
نماز کے اوقات
پیرس(رضا چوہدری / نمائندہ جنگ )لیون کے قریب سونے کی ریفائننگ لیب پر مسلح حملہ، €12 ملین کی لوٹ مار کی کوشش ناکام ، چھ ملزمان گرفتار۔ تفصیلات کے مطابق فرانس کے مشرقی–شمالی علاقے میں واقع Laboratoires Pourquery نامی سونے کی ریفائننگ لیب، جو Lyon شہر کے قریب واقع ہے، پر گزشتہ روز ایک منظم مسلح گروہ نے حملہ کیا۔ حملہ تقریباً چھ افراد نے کیا جنہوں نے دھماکہ خیز مواد اور فوجی درجے کے خودکار ہتھیار استعمال کیے۔عینی شاہدین اور سکیورٹی فوٹیج کے مطابق، حملہ آوروں نےفوجی ملبوسات اور جعلی پولیس بازو بینڈز پہن رکھے تھے،ان کے پاس کلاشنکوف طرز کی رائفلز تھیں،جبکہ کارروائی کے لئے سفید وین استعمال کی گئی۔ویڈیو میں دیکھا گیا کہ ایک شخص وین سے سیڑھی نکالتا ہے اور دوسرا اس پر چڑھ کر عمارت کے اندر داخل ہوتا ہے۔ بعد ازاں سیاہ بریف کیس وین میں لوڈ کیے جاتے دکھائی دیتے ہیں۔ حملہ آوروں نے دھماکہ خیز مواد سے لیب کے دروازے اور مضبوط حفاظتی شیشے توڑے۔ابتدائی اندازوں کے مطابق، لیب سے تقریباً €12ملین مالیت کے قیمتی دھات اور سونے کو چرانے کی کوشش کی گئی۔ حملے کے وقت 28 ملازمین لیب میں موجود تھے جن میں سے پانچ معمولی زخمی ہوئے، جب کہ تین کو احتیاطی طبی معائنے کے لئے اسپتال منتقل کیا گیا۔ فرانسیسی پولیس نے بروقت کارروائی کرتے ہوئے ملزمان کو فرار ہونے سے قبل ہی Vénissieux نامی قریبی قصبے میں گرفتار کرلیا۔
