فرمان الہی
نماز کے اوقات
بالی ووڈ کے لیجنڈری اداکار دھرمیندر کو ممبئی کے بریچ کینڈی اسپتال سے ڈسچارج کر دیا گیا ہے۔
بھارتی میڈیا رپورٹس کے مطابق 89 سالہ اداکار کو (آج) بدھ کی صبح ممبئی کے اسپتال سے ڈسچارج کر دیا گیا ہے۔ تاہم ان کا علاج اب گھر پر جاری رہے گا۔
میڈیا رپورٹس کے مطابق بدھ کی صبح ایک ایمبولینس کو اسپتال سے اداکار کے گھر جاتے ہوئے دیکھا گیا۔
دھرمیندر کا علاج کرنے والے ڈاکٹر نے اس حوالے سے تصدیق کرتے ہوئے کہا کہ ’دھرمیندر کو صبح تقریباً ساڑھے 7 بجے اسپتال سے ڈسچارج کردیا گیا ہے۔‘
انہوں نے بتایا کہ ’اہل خانہ کے فیصلے کے مطابق اب دھرمیندر کا مزید علاج گھر پر جاری رہے گا۔‘
دھرمیندر کا علاج کرنے والے ڈاکٹر کے بعد اہل خانہ نے بھی اس حوالے سے بیان جاری کر دیا ہے۔
ان کا کہنا ہے کہ دھرمیندر کو اسپتال سے ڈسچارج کر دیا گیا ہے اور اب وہ اپنی صحت یابی کا عمل گھر پر جاری رکھیں گے۔ ہم میڈیا اور عوام سے مؤدبانہ درخواست کرتے ہیں کہ کسی بھی قسم کے اندازوں یا افواہوں سے گریز کریں اور اس وقت ان اور ان کے خاندان کی پرائیوسی کا احترام کریں۔ ہم سب آپ کے پیار، دعاؤں اور نیک خواہشات کے بے حد شکر گزار ہیں۔ براہِ کرم ان کا احترام کریں، کیونکہ وہ آپ سب سے محبت کرتے ہیں۔
واضح رہے کہ گزشتہ روز مختلف میڈیا آؤٹ لیٹس کی جانب سے اداکار کی موت کی جھوٹی خبریں شائع کی گئی تھیں۔ ان افواہوں پر ردعمل دیتے ہوئے دھرمیندر کی بیٹی ایشا دیول اور اہلیہ ہیما مالنی نے ایک بیان جاری کیا تھا، جس میں انہوں نے دھرمیندر کی صحت یابی سے متعلق آگاہ کرتے ہوئے دعاؤں کی اپیل کی تھی۔
واضح رہے کہ مبینہ طور پر بھارتی اداکار دھرمیندر کو 31 اکتوبر کو سانس لینے میں تکلیف کی شکایت کے باعث اسپتال میں داخل کیا گیا تھا۔
میڈیا ذرائع کے مطابق دھرمیندر کو 10 نومبر سے وینٹی لیٹر پر رکھا گیا تھا اور ان کی حالت نہایت نازک بتائی جا رہی تھی۔ تاہم اب اسپتال سے ڈسچارج ہونے کے بعد گھر پر ہی زیر علاج ہیں۔
دھرمیندر بھارتی سینما کے لیجنڈری اداکاروں میں سے ایک ہیں، انہوں نے شعلے، دھرم ویر، چپکے چپکے، میرا گاؤں میرا دیش اور ڈریم گرل جیسی یادگار فلموں میں کام کیا۔
انہیں حال ہی میں فلم تیری باتوں میں ایسا الجھا جیا میں شاہد کپور اور کریتی سینن کے ساتھ دیکھا گیا جبکہ ان کی نئی فلم اکیس (IKKIS) 25 دسمبر کو ریلیز ہونے والی ہے، جس میں وہ امیتابھ بچن کے نواسے آگستیہ نندا کے ساتھ نظر آئیں گے۔
