• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

جاپانی وفد کی صوبائی وزیر سوشل ویلفیئر سے ملاقات،تعاون بڑھانے پر اتفاق

میرا شہر
لاہور
30 نومبر ، 2025
لاہور(خبرنگار)جاپان سے آئے افرادِ باہم معذوری کے وفد نے صوبائی وزیر سوشل ویلفیئر اینڈ بیت المال پنجاب سہیل شوکت بٹ سے ملاقات کی۔ صوبائی وزیر نے غیر ملکی مہمانوں کی نشستوں پر جا کر خود انہیں خوش آمدید کہا اور وفد کے ساتھ خوشگوار تبادلہ خیال کیا۔ اس ہونے والی ملاقات میں پاکستان اور جاپان میں افرادِ باہم معذوری کو دستیاب سہولتوں، معاونت اور تجربات پر تفصیلی بات چیت کی گئی۔ دونوں ممالک نے معذور افراد کی فلاح و بہبود کے شعبے میں باہمی تعاون کو مزید فروغ دینے پر اتفاق کیا۔ جاپانی وفد کو وزیر اعلیٰ پنجاب کے ہمت کارڈ پروگرام، معاون آلات کی فراہمی، بحالی کے اقدامات اور دیگر فلاحی منصوبوں پر جامع بریفنگ دی گئی۔ اس موقع پر متعلقہ افسران نے وفد کو دسمبر میں ہونے والی سی ایم اسپیشل گیمز کے بارے میں بھی آگاہ کیا۔ سہیل شوکت بٹ نے افرادِ باہم معذوری کے لیے انڈیپینڈنٹ لیونگ سینٹر کے قیام کے حوالے سے تجاویز طلب کرتے ہوئے کہا کہ خصوصی افراد کی نگہداشت اور ان کی بااختیاریت کے لیے جدید خطوط پر تربیتی کورسز شروع کیے جائیں گے۔
لاہور سے مزید