فرمان الہی
نماز کے اوقات
بولیویا کے اینڈیز پہاڑی سلسلے میں سائنس دانوں نے 18 ہزار سے زائد ڈائنوسار کے قدم کے نشانات دریافت کرلیے، جسے دنیا کی سب سے بڑی واحد ڈائنوسار فٹ پرنٹس سائٹ قرار دیا جا رہا ہے، یہ نشانات تقریباً 7 کروڑ سال تک محفوظ رہے۔
یہ اہم دریافت امریکی ریاست کیلیفورنیا کی یونیورسٹی کے ماہرین کی جانب سے 6 سالہ تحقیق اور فیلڈ ورک کے بعد سامنے آئی، جسے معروف سائنسی جرنل PLOS One میں شائع کیا گیا۔
ٹیم نے ٹورو ٹورو Toro Toro نیشنل پارک کے علاقے کاریراس پمپا Carreras Pampa میں 16600 قدم کے نشانات نہایت باریکی سے دستاویزی شکل میں محفوظ کیے، جب کہ اضافی 1378 سوئم ٹریکس swim tracks بھی دریافت ہوئیں، جو ان ڈائنوسار کے ہیں جو قدیم جھیل میں تیرتے یا پانی میں چلتے تھے۔
فٹ پرنٹس میں زیادہ تعداد تھیروپوڈز کی ہے، یہ دو ٹانگوں والے گوشت خور ڈائنوسار کہلاتے ہیں۔
تحقیق کے شریک مصنف روبرٹو بیاجّی کے مطابق دنیا میں کہیں بھی تھیروپوڈز کے اتنے زیادہ فٹ پرنٹس ایک ہی جگہ نہیں ملتے۔
انہوں نے کہا کہ اس مقام پر متعدد عالمی ریکارڈ قائم ہوئے ہیں، نشانات میں چھوٹے 10 سینٹی میٹر کے فٹ پرنٹس بھی شامل ہیں، جو مرغی کے سائز کے ڈائنوسار کے تھے، جبکہ بڑے 30 سینٹی میٹر کے نشانات ایسے دیوہیکل ڈائنوسار کے تھے جس کی اونچائی تقریباً 33 فٹ تک تھی۔
