فرمان الہی
نماز کے اوقات
کراچی (عبدالماجد بھٹی) پاکستان سپر لیگ الیون میں بقیہ دو ٹیموں کو شامل کرنے کے لئے ٹینڈر پر بولی کے لئے نیلامی 8 جنوری کو اسلام آباد کنوینشن سینٹر میں میں کرائی جائے گی ۔ نئی ٹیموں کی بولی کے لئے بیس پرائس چالیس لاکھ ڈالرز مقرر کی گئی ہے۔ اس میں اضافہ کا امکان ہے۔ بولی میں شامل ہونے والوں کو سیکیورٹی ڈپازٹ کے طور پر دو لاکھ ڈالرز بڈنگ فیس جمع کرانا ہوگی جو بولی میں ناکام رہے گا اسے بیس ہزار ڈالرز فیس کے طور پر ادا کرنا ہوں گے جبکہ ایک لاکھ 80ہزار ڈالرز واپس کردیئے جائیں گے۔ ذمے دار ذرا ئع کا کہنا ہے کہ پی سی بی کی بڈ کمیٹی ،تمام ٹیکنیکل معاملات کا جائزہ لے گی۔ کوالی فائیڈ بڈرز کو نیلامی میں شامل ہونے کے لئے مدعو کیا جائے گا۔ جنگ کو ذمے دار ذرائع نے بتایا کہ جو مالک دس سالہ حقوق کے لئے فرنچائز خریدے گا وہ پہلے تین سال اسے فروخت نہیں کرسکے گا البتہ تین سال بعد2029 میں اگر وہ چاہے تو اپنی مرضی سے مالکانہ حقوق سے دستبردار ہوسکتا ہے۔ پی سی بی کے ٹینڈر دستاویز کے مطابق تمام 8ٹیموں کو 2026 سے2030 تک پانچ سال کے لئے سینٹرل پول سے تیس لاکھ ڈالرز سالانہ ملیں گے لیکن دستاویز میں بقیہ پانچ سال کا ذکر نہیں ہے۔ ذرائع کا کہنا ہے کہ علی ترین اور پاکستان کرکٹ بورڈ میں تنازع کی وجہ سے ملتان سلطانز کے مالک نے فرنچائز کا خیر باد کہنے کا اعلان کیا ہے ان کا معاہدہ31 دسمبر کو ختم ہوجائے گا ۔ پی سی بی کے زیر غور یہ تجویز ہے کہ آئندہ سال ملتان سلطانز کے معاملات پی سی بی خود چلائے۔ تاہم اس بارے میں پی سی بی انتظامیہ کو حتمی فیصلہ کرنا ہے۔ پاکستان سپر لیگ نے 11ویں ایڈیشن کی ونڈو کا اعلان کر دیا ہے۔ پی ایس ایل کا میلہ اگلے برس 26 مارچ سے 3 مئی تک مختلف شہروں میں سجے گا۔ اسی تاریخ کو بھارتی لیگ آئی پی ایل شروع ہوگی۔
