فرمان الہی
نماز کے اوقات
کھلونوں کی معروف کمپنی میٹل (Mattel) نے اپنی تاریخ کی پہلی آٹسٹک باربی متعارف کروادی ہے۔
یہ خصوصی باربی آٹسٹک سیلف ایڈووکیسی نیٹ ورک کے اشتراک سے تیار کی گئی ہے، جو آٹسٹک افراد کو بااختیار بنانے اور اس بات کی عکاسی کرنے کے لیے کام کرتی ہے کہ آٹزم اسپیکٹرم میں مبتلا افراد دنیا کو کس طرح مختلف انداز میں دیکھتے اور محسوس کرتے ہیں۔
آٹسٹک باربی اس وقت میٹل شاپ اور ٹارگٹ پر دستیاب ہے، جبکہ مارچ میں اسے امریکا بھر کے وال مارٹ اسٹورز میں بھی فروخت کے لیے پیش کیا جائے گا، یہ باربی، باربی فیشنِسٹاز کلیکشن کا حصہ ہے، جس میں پہلے ہی ڈاؤن سنڈروم میں مبتلا باربی، نابینا باربی اور ویٹیلیگو کے ساتھ باربی اور کین شامل ہیں۔
ماہرین کے مطابق آٹزم ایک قسم کی نیورو ڈائیورجینس ہے، جو اس بات کو متاثر کرتی ہے کہ انسان دنیا کو کیسے سمجھتا ہے اور دوسروں کے ساتھ کس طرح میل جول کرتا ہے، آٹزم کی علامات ہر فرد میں مختلف ہوتی ہیں اور اندازوں کے مطابق ہر 100 میں سے ایک سے زائد بچے آٹزم اسپیکٹرم پر ہوتے ہیں۔
آٹسٹک باربی میں وہ خصوصیات شامل کی گئی ہیں جو حقیقی زندگی میں آٹسٹک بچوں کے تجربات کی عکاسی کرتی ہیں، جس میں شور سے بچاؤ کے لیے ہیڈفونز، توجہ برقرار رکھنے کے لیے فجٹ اسپنر، آرام دہ اور ڈھیلے کپڑے اور بات چیت میں مدد کے لیے ٹیبلٹ شامل ہیں۔
اس باربی کی آنکھیں ہلکی سی ایک جانب دیکھتی ہیں، جو اس بات کی علامت ہے کہ کچھ آٹسٹک افراد براہِ راست آنکھوں میں دیکھنے سے گریز کرتے ہیں، اس کے علاوہ اس کی کہنیاں اور کلائیاں مڑنے کے قابل ہیں، جس سے ہینڈ فلیپنگ جیسی حرکات ممکن ہوتی ہیں، جو بعض آٹسٹک افراد کے لیے دباؤ کم کرنے یا جذبات کے اظہار میں مددگار ثابت ہوتی ہیں۔
کمپنی کے مطابق یہ باربی تین سال یا اس سے زائد عمر کے بچوں کے لیے تیار کی گئی ہے اور اس کی مجوزہ قیمت 11.87 امریکی ڈالر مقرر کی گئی ہے۔
