فرمان الہی
نماز کے اوقات
چیئرمین قومی احتساب بیورو (نیب ) لیفٹیننٹ جنرل (ر) نذیر احمد نے وزیراعلیٰ سندھ مراد علی شاہ کو سرکاری زمین کی بازیابی کی دستاویز دے دیں۔
وزیراعلیٰ سندھ سے چیئرمین نیب نے کراچی میں ملاقات کی، اس موقع پر سرکاری زمین کی واپسی کے لیے مشترکہ کارروائی کا اعادہ کیا گیا۔
ترجمان وزیراعلیٰ ہاؤس کے مطابق ملاقات میں وزیراعلیٰ سندھ کو چیئرمین نیب نے سرکاری زمین کی بازیابی سے متعلق رپورٹ اور سندھ حکومت کو زمین کی واپسی سے متعلق دستاویزات پیش کیں۔
اپنی بریفنگ میں بتایا کہ نیب نے سرکاری زمین سے متعلق 188 مقدمات کی تحقیقات مکمل کی ہے، تفتیش کے بعد قبضہ مافیا سے مجموعی طور پر 4 لاکھ 61 ہزار ایکڑ سے زائد زمین واپس لے لی۔
چیئرمین نیب کی بریفنگ میں بتایا گیا کہ واپس لی گئی زمین میں ایویکیو لینڈ 635 ایکڑ، کلفٹن بلاک ون اور ٹو کی 350 ایکڑ سمندری زمین، سجاول اور ٹھٹہ میں 4 لاکھ ایکڑ جنگلات کی زمین شامل ہے۔
چیئرمین نیب کی بریفنگ میں بتایا گیا کہ جامشورو میں 83 جعلی ریونیو اندراجات منسوخ کروانے کے بعد 1 ہزار 40 ایکڑ زمین واگزار کروائی گئی۔
وزیراعلیٰ نے عوامی اثاثوں کی واپسی پر نیب کا شکریہ ادا کیا اور جنگلات اور مینگرووز کی زمین سے متعلق سمریوں کی فوری منظوری کی ہدایت کردی۔
