فرمان الہی
نماز کے اوقات
بھارتی ریاست مدھیہ پردیش میں ایک دل دہلا دینے والا واقعہ پیش آیا ہے جہاں ایک اسنوکر کلب کے اندر دسویں جماعت کے 16 سالہ طالب علم کو 2 نابالغ لڑکوں نے چاقو اور خنجر سے 30 سیکنڈ کے اندر 27 بار وار کر کے شدید زخمی کر دیا۔
بھارتی میڈیا کے مطابق واقعے کی سی سی ٹی وی فوٹیج میں دیکھا جا سکتا ہے کہ دونوں حملہ آور فلمی انداز میں کلب میں داخل ہوئے، طالب علم کو گھیر کر تیزی سے حملہ کیا اور موقع سے فرار ہو گئے۔
حیران کن طور پر ملزمان نے یہی ویڈیو خود سوشل میڈیا پر بھی وائرل کی ہے۔
بھارتی میڈیا کے مطابق زخمی طالب علم کی ایک کلائی پر 10 سے زائد گہرے زخم آئے ہیں جبکہ دوسرے ہاتھ کی 2 انگلیاں کٹ گئی ہیں، اس کے علاوہ کندھے اور پیٹھ پر بھی شدید گہرے زخم آئے ہیں، حملے کے باوجود طالب علم کسی طرح جان بچا کر کلب سے باہر نکلنے میں کامیاب رہا، بعد ازاں اسے اسپتال منتقل کیا گیا جہاں اس کا علاج جاری ہے۔
پولیس کے مطابق واقعہ 15 فروری کی رات اسنوکر کلب میں پیش آیا تھا، متاثرہ لڑکا اور ملزمان ایک ہی کوچنگ سینٹر میں پڑھتے ہیں۔
ابتدائی تفتیش میں بتایا گیا ہے کہ چند دن پہلے کھیل کے دوران برتری کے تنازع پر جھگڑا ہوا تھا، جس میں مبینہ طور پر متاثرہ طالب علم نے دونوں ملزمان کو تھپڑ مارے تھے، ملزمان نے اسی کا بدلہ لینے کے لیے اپنے سینئر پر حملہ کیا۔
پولیس نے مقدمہ درج کر کے دونوں نابالغ ملزمان کو حراست میں لے لیا ہے تاہم نوٹس جاری کرنے کے بعد انہیں رہا کر دیا گیا۔
پولیس کا کہنا ہے کہ میڈیکل رپورٹ آنے کے بعد مقدمے میں مزید سنگین دفعات شامل کی جائیں گی۔
