فرمان الہی
نماز کے اوقات
ایران نے علی لاریجانی کے بعد محمد باقر ذوالقدر کو سپریم نیشنل سیکیورٹی کونسل (SNSC) کا نیا سربراہ مقرر کر دیا ہے۔
سپریم نیشنل سیکیورٹی کونسل کے سابق سربراہ علی لاریجانی گزشتہ ہفتے ایک فضائی حملے میں شہید ہو گئے تھے۔
عرب میڈیا کے مطابق ذوالقدر ایک سابق ایرانی پاسداران انقلاب (IRGC) کے کمانڈر اور 2023ء سے مشاورتی ادارہ کونسل کے سیکریٹری ہیں، وہ ایران-عراق جنگ میں بھی حصہ لے چکے ہیں اور طویل عرصے تک IRGC کے اعلیٰ عہدوں پر فائز رہے۔
‘الجزیرہ‘ کے مطابق ذوالقدر کی تقرری کی وجہ محض حالیہ جنگ نہیں بلکہ ایک طویل غور و فکر کے بعد کی گئی ہے تاکہ ایسے شخص کو منتخب کیا جا سکے جو داخلی اور خارجی سیکیورٹی چیلنجز سنبھال سکے۔
ایران کو درپیش چیلنجز کیا ہیں؟
ملک میں جاری فضائی حملے اور داخلی احتجاج ذوالقدر کے لیے فوری امتحان ہیں۔
ایران کی جانب سے میزائل حملے اور ہرمز کی تنگی کے ذریعے دباؤ جاری ہے جس سے عالمی معیشت پر اثر پڑ رہا ہے۔
امریکی مذاکرات میں بھی ذوالقدر کا کردار اہم ہوگا کیونکہ کسی بھی معاہدے کی منظوری کے لیے اِن کی رضامندی ضروری ہوگی۔
بین الاقوامی میڈیا رپورٹس میں کہا جا رہا ہے کہ ایران کی قیادت اس وقت قومی سیکیورٹی میں مزید عسکری قوت شامل کرنے کی کوشش کر رہی ہے اور ذوالقدر اس حساس ذمہ داری کو سنبھالنے کے لیے منتخب کیے گئے ہیں۔
