فرمان الہی
نماز کے اوقات
پاکستان کرکٹ ٹیم کے سابق کپتان شاہد خان آفریدی نے آ ج کے دن سال 1996 میں اپنے کریئر کی سب سے تیز ترین سنچری بنائی تھی۔ جس کے 22 سال مکمل ہونے پر انہیں سوشل میڈیا پر مبارک باد دی جارہی ہے۔
سماجی رابطے کی ویب سائٹ ٹوئٹر پر شاہد آفریدی کے ایک صارف نے اُن کی 1996 میں سری لنکا کے خلاف کھیلے جانے والے میچ کی ویڈیو شیئرکرتے ہوئے لکھا کہ ’آج کے دن 1996 میں شاہد آفریدی نے 37 بالز پر تیز ترین سنچری اُس وقت کی ورلڈ چیمپئنزٹیم سری لنکا کے خلاف کھیلتے ہوئےبنائی، جو کہ اب تک کی تیسری تیز ترین ون ڈے انٹرنیشنل سنچری ہے جبکہ یہ پہلی تیز ترین سنچری ہے جوکسی ایشین بیٹسمن کی جانب سے بنائی گئی۔ ہیش ٹیگ کے ساتھ انہوں نے #BoomBoom #Memoriesلکھا۔ ‘
’عثمان ستتی‘ نامی صارف کے ٹوئٹ کا جواب دیتے ہوئے شاہد آفریدی نے بھی لکھا کہ ’نیروبی میں شاندار دن کو22 سال گزر گئے! آج بھی وہ اننگ یاد ہے اور وہ لمحہ جس نے میری زندگی بدل دی۔ اپنے مداحوں کا شکریہ ادا کرتے ہوئے انہوں نے لکھا کہ ’اُن تمام سالوں میں آپ کی محبت اور حمایت کا بے حد شکریہ ۔‘
اس کے علاوہ انہوں نے اپنی ٹیم کا بھی شکریہ ادا کیا اور لکھا کہ ’میری ٹیم کے تمام کھلاڑیوں کا مجھ پر اعتماد کرنے کے لیے شکریہ۔‘
اسی حوالے سے آئی سی سی نے بھی اپنے ٹوئٹر ہینڈل سے ایک ٹوئٹ جاری کیا ہے جس میں انہوں نے لکھا کہ’ 40 بالز، 6 چوکھے، 11 چھکے، 102 رنز! آج کے دن 1996 میں بوم بوم آفریدی نےسری لنکا کے خلاف 37 بالز پر 100 رنز بنائے ،یہ اس وقت ون ڈے انٹر نیشنل کی تیز ترین سنچری تھی۔ ‘
واضح رہے کہ شاہد آفریدی نے 4 اکتوبر 1996میں سری لنکا کےخلاف 37 بالزپرتیزترین سنچری کا ریکارڈ بنا کردنیا بھر میں مشہور ہوگئے تھے، ان کا یہ ریکارڈ پہلے یکم جنوری 2014کو نیوزی لینڈ کے ’کورے اینڈرسن‘ اور پھرفروری 2015میں جنوبی افریقا کے’ اے بی ڈی ویلیئرز ‘نے توڑا۔
تاہم ایشیا سےاب تک کوئی کھلاڑی اُن کا یہ ریکارڈ نہیں توڑ سکا ہے۔
