پاکستان وویمن ٹیم نے پہلے ٹی ٹوئنٹی میں بنگلہ دیش وویمن ٹیم کو شکست دے دی

26 اکتوبر ، 2019

پاکستان وویمن کرکٹ ٹیم نے سیریز کے پہلے ٹی ٹوئنٹی میں سنسنی خیز مقابلے کے بعد بنگلہ دیش وویمن ٹیم کو شکست دے دی۔

قذافی اسٹیڈیم لاہور میں کھیلے گئے اس میچ میں پاکستان وویمن ٹیم کی کپتان بسمہ معروف نے ٹاس جیت کر پہلے بیٹنگ کرنے کا فیصلہ کیا۔

یہ فیصلہ اس وقت درست ثابت نہ ہوسکا جب 3 اوورز میں 15 کے مجموعے پر پاکستان ٹیم جوریہ خان اور سدرہ امین جیسی باصلاحیت کھلاڑیوں کی وکٹوں سے محروم ہوگئی۔

کپتان بسمہ معروف نے عمیمہ سہیل کے ہمراہ ذمہ دارانہ بیٹنگ کا مظاہرہ کرتے ہوئے ٹیم کو خسارے سے نکالا اور 60 رنز کی شراکت قائم کی۔

بسمہ معروف 34 رنز بنا کر 75 جبکہ عمیمہ سہیل 33 رنز بنا کر 79 کے مجموعے پر آؤٹ ہوگئیں۔

ارم جاوید کے 21 اور سدرہ نواز کے برق رفتار 16 رنز کی مدد سے پاکستان وویمن ٹیم مقررہ 20 اوورز میں 126 رنز بنانے میں کامیاب ہوئی۔

بنگلہ دیش کی جانب سے کامیاب بولر جہاں آرا عالم رہیں جنہوں نے 17 رنز کے عوض 4 وکٹیں حاصل کیں۔

مطلوبہ ہدف کے تعاقب میں بنگلہ دیش کا آغاز بھی اچھا نہ تھا اور اس کی دونوں اوپنرز تیسرے اوور میں 6 کے مجموعے پر پویلین لوٹ گئیں۔

مہمان ٹیم کی رومانہ احمد دیگر ساتھی کھلاڑیوں کے ساتھ شراکتیں قائم کرتے ہوئے ٹیم کو جیت کی جانب لے گئیں تاہم پاکستانی بولرز کی نپی تلی بولنگ کی وجہ سے مہمان ٹیم مقررہ 20 اوورز میں 7 وکٹوں کے نقصان پر 112 رنز ہی بناسکی جس کے ساتھ ہی پاکستان 14 رنز سے کامیاب ہوگیا۔