شوہر کی رہائی کے بعد ماریہ بی کا ویڈیو پیغام

25 مارچ ، 2020

لاہور میں مقیم معروف ڈیزائنر ماریہ بی کے شوہر طاہر سعید کو کورونا وائرس پھیلانے کے الزام میں نشتر کالونی پولیس نے گرفتار کرلیا تھا جو فی الحال ضمانت پر رہا ہوگئے ہیں۔

طاہر سعید نے گھریلو ملازم کو کورونا ٹیسٹ مثبت آنے کے باوجود اسپتال داخل کرانے کی بجائے مریض کو اس کے گاؤں وہاڑی بھجوا دیا تھا۔

اطلاع ملتے ہی پولیس نے طاہر سعید کے خلاف مقدمہ درج کر کے گرفتار کر لیا اور بعد ازاں ضمانت پر رہا کر دیا جبکہ کورونا کے مریض عمر فاروق کو وہاڑی سے ریسکیو کر کے میو اسپتال منتقل کر دیا گیا۔

شوہر کی گرفتاری کے بعد ماریہ بی کی ایک ویڈیو سوشل میڈیا پر وائرل ہوئی تھی جس میں وہ روتے ہوئے پنجاب پولیس کی کارروائی اور سسٹم کو تنقید کا نشانہ بناتی نظر آئیں اور اپنے شوہر کے لیے انصاف کا مطالبہ کرتی نظر آئیں۔

شوہر کی رہائی کے بعد ماریہ بی اور ان کے شوہر کی جانب سے 19منٹ سے زائد کا ایک ویڈیو پیغام سامنے آیا ہے جس میں وہ عمران خان اور پاک فوج کی شکر گزار ہیں جبکہ پولیس کو تنقید کا نشانہ بنارہی ہیں۔

ویڈیو میں ماریہ بی اور ان کے شوہر نے اس تمام معاملے پر بات کرتے ہوئے بتایا کہ ہم پر بے بنیاد الزام لگا کر رات 12 بجے پولیس نے چھاپہ مار کر طاہر سعید کو گرفتار کیا۔

ماریہ بی اور ان کے شوہر نے بتایا کہ ملازم کو انہوں نے احتیاطی تدابیر اور سیلف آئیسولیشن کے حوالے سے تمام تر تاکید کر کے اسے گھر کے لیے روانہ کیا۔

انہوں نے یہ بھی بتایا کہ ملازم کو انہوں نے تنخواہ اور اضافی رقم تھمائی اور ملازم کی خواہش پر پرائیوٹ گاڑی میں گھر روانہ کیا۔

انہوں نے بتایا کہ ان کی پوری فیملی نے کورونا ٹیسٹ کروائیں ہیں جو منفی ہیں۔

دوسری جانب ڈیزائنر کے اس اقدام پر سوشل میڈیا پر ملے جلے تبصرے سامنے آرہے ہیں۔

تازہ ترین