پاکستانی فنکار اسرا بلجیک کی حمایت میں بول پڑے

16 جولائی ، 2020

پاکستان فنکار بھی تُرک اداکارہ کی حمایت میں بول پڑے

تُرک اداکارہ اسراء بلجیک کو پاکستانی کمپنی کا برانڈ ایمبیسڈڑ بنانے پر پاکستانی فنکاروں کی جانب سےاداکارہ کے لیے حمایتی پیغامات جاری کیے جارہے ہیں۔

مائیکرو بلاگنگ سائٹ ٹوئٹر پر اعجاز اسلم نے ٹوئٹ کرتے ہوئے کہا کہ ’پاکستان میں جب ترکش مواد نشر کیا جائے گا تو ظاہر سی بات ہے کہ ترکش فنکار بھی پاکستان آئیں گے، اِس میں مسئلہ کیا ہے؟‘

اعجاز اسلم نے لکھا کہ ’چلیں ہم بھی ترکش زبان سیکھ لیتے ہیں کیونکہ ایک طاقتور مقابلہ ہی ہمیشہ اچھا ہوتا ہے، اسی لیے برہمی کا اظہار کرنے کے بجائے اِس بات کو ہلکا لیں۔‘

اداکارہ عائشہ عُمر نے ٹوئٹ کرتے ہوئے لکھا کہ ’میں اِس بات کی حمایت کروں گی کہ غیر ملکی فنکار پاکستانی برانڈز کی توثیق کریں کیونکہ یہ ہمارے برانڈز کو بین الاقوامی سطح پر مقبول بنانے کا ایک اہم ذریعہ ہے۔‘

عائشہ عُمر نے لکھا کہ ’ہمارا ملک پاکستان غیر ملکی ستاروں کا استقبال کرنے کا منتظر ہے آیئے ہم سب ملکر اِس اچھے کام میں تعاون کریں اور خوشی سے غیر ملکی فنکاروں کا استقبال کریں۔‘

اداکار و ماڈل بلال اشرف نے ٹوئٹ کرتے ہوئے لکھا کہ ’ہمیں پوری دُنیا کے فنکاروں کاپا کستان میں خیر مقدم کرنے کی ضرورت ہے کیونکہ فن کی کوئی زبان یا سرحد نہیں ہوتی ہے۔‘

بلال اشرف نے لکھا کہ ’ہر شعبے میں سیاست نہ کریں اور دل سے غیر ملکی فنکاروں کو خوشی آمدید کہیں کیونکہ پاکستان ایک زندہ دل قوم کا ملک ہے اور پاکستانی عوام کے دلوں میں پیار ہی پیار ہے۔‘

یاد رہے کہ اِس سے قبل یاسر حسین، ایمن خان اور منال خان کی جانب سے ترک اداکارہ اسراء بلجیک کو پاکستانی کمپنی کا برانڈ ایمبیسڈر بنائے جانے پر اظہار برہمی کیا گیا تھا اور اِس ضمن میں اِن تینوں فنکاروں نے فوٹو اور ویڈیو شیئرنگ ایپ انسٹاگرام کی اسٹوری میں اپنے پیغامات جاری کیے تھے۔

واضح رہے کہ گزشتہ دنوں یہ خبر سامنے آئی تھی کہ شہرہ آفاق تُرک سیریز ’ارطغرل غازی‘ میں حلیمہ سلطان کا مرکزی کردار ادا کرنے والی تُرک اداکارہ اسراء بلجیک پاکستانی کمپنی کی برانڈ ایمبیسڈر بن گئیں۔

اسمارٹ فون کمپنی نے سوشل میڈیا کے ذریعے اعلان کیا کہ اسراء بلجیک کو نئی ڈیوائس ویو میکس پرو کے لیے برانڈ ایمبیسڈر مقرر کردیا گیا ہے۔

تازہ ترین